PATHIAN TANA KAN RINAWM RENG THEIH NAN CHAPONA LAKAH KAN INVENG FIMKHUR RENG TUR A NI.

#ZONEWS #FIANRIAL August 09, 2025:
Vawiin kan fianrial hunah chuan, Israel rama sualna thianfaitu, Pathian mi hman Jehua chanchin hi ngaihtuah ila. Jehua kha a tirah Pathian a duh em em a, a tawpah erawh ama sualnaah a tlu ta thunga. Jehua chanchin hian, thuneihna chan avang leh kan hlawhtlinna chan avanga kan rinna a chhiat mai a hlauhawm zia leh chutiang a thlen loh nan chuan Pathian min kohnaa kan awm reng a pawimawh zia a tar lang a ni.

Chapona chu boralna hmaah a kal a, Rilru intivei chu tlukna hmaah (Thufingte 16:18).

A tira kan thiltum leh kan tihchhan hloh thakin kan thiltih zawka chuan min chimral ta ni maia inhriat changte kan nei ve tawh thin em?

2 Lalte 9:30-10:36-ah chuan, Jezebeli sualna thiltihte, Lal Ahaba thiltih tha lote, Baala biaknate Israel ram atanga tibo turin Jehua chu Pathianin a ruat a. Pathianin a ruatna chhan ang ngeiin Jezebeli a hmachhawn a, Ahaba fapa 70 zet maite tihlumn, Baala zuitute leh a zawlneite chu a that vek bawk a ni.

A tira Jehua inpekna leh a chet dan chu Pathian duhdan nen a inmil thlap a ni. Jezebeli chu Jorama awmna thinah chuan hmachhawnin, Jehua chuan amah Jezebeli chhiahhlawh ngei mai pakhat chu tukverha rawn paih chhuak tura a tih angin a rawn paih chhuak a ni.

Pathianin a zawlneite hmanga Ahaba thlahte laka thu a lo sawi tawh tifamkim turin, Jorama fate 70 zet chu anmahni enkawltu chuan a that vek bawk a. Jehua chuan Baala zawlneite leh a zuitute chu ruai theh tur anga sawm khawmin a lo that vek a, Israel ram atangin Baala biakna a tibo ta a ni.

Nimahsela, Jehua chu a chhung lam sualna chuan a chanchin chu a thim zawngin a her ta thung a. Pathian tana a thahnem ngaihna chu ama mimal hamthatna tur leh thuneihna chan a tum lutukna chuan a tibuai ta a. Thuhnuairawlh taka awm a, Pathian koh chhan anga awm zui thei tawh lovin, chhiatnaah amah leh amah a inbarh lut ta a ni. Thuneih chakna leh kan mimal hamthatna zawnna ten kan rinna a tihchhiat theih zia Jehua chanchin hian min zirtir chiang hle mai.

NGUN TAKIN INNGAIHTUAH ILA!
Kan mimal nundan leh kan eizawnna ten kan nun a nghawng dan uluk takin ngaihtuah teh ang. Thuneihna kan chan emaw, kan hlawhtlinna chan emaw khan kan rinna leh kan duhzawng lo ni thinte kha kawng thenkhatah a lo thlak danglam ve tawh reng lo maw?

Jehua chanchin hian, Pathianin kan nuna a thiltumte hloh mai hlauhawm zia min hriattir a. Kan thutlukna siam turte, kan thiltih hrim hrimahte Pathian hnen atangin finna dil zel thin ang aw.

ṬAWNGṬAINA
Tin, alut a, a eiin a in a; “Ânchhe dawngnu kha va ngaihven ta ula, va phûm rawh u, lal fanu a ni si a,” a ti a (2 Lalte 9:34)

Aw Lalpa, Nang chuan hmelmapa Setana do a, a hnathawhte tichhe turin hriak mi thih tawh tih ka hria e. Ka vela Setana hnathawhte tichhia a, pathian diklo leh milem biakna ka nuna awm zawng zawngte ka tihchhiat vek hma chuan, chawl lova hma lam pan zel turin min pui ang che. Ka thinlung zawng zawngin I thu ang zela awm ka duh e. Ka Pa vana mi, nangma awmna hlata kal sawn ka duh lo a. Titha thei lo ni a ka inhriat chang pawhin, ka ngaihtuahnate nangmahah chawlhtirin, ka tana I thatna zawng zawngte chu min hriatnawn tir leh ang che. Nangma thiltihtheihna kal tlang chauhin hlawhtlinna dik tak chu ka chang thei si a. Isua hmingin ka dil e, Amen!