Chawngtlai khuain May – July thla chhungin tomato quintal 976.81 an thar

#ZONEWS Chawngtlai August 09, 2025: Chawngtlai khua tomato chingtu ten kumin 2025 May thla atanga July thleng khan tomato quintal 976.81 an hralh chhuak.

Pu R Biakhmingliana, Secretary, Chawngtlai Tomato Grower’s Association hnen atanga thu kan dawn danin, kumin May – July thla chhung khan tomato 976.81 qtls an hralh a, tomato hi grade hnihah then niin, Grade A – 864.05 qtls leh Grade B – 112.76 qtls hralh chhuah a ni a, tomato hralhna atang hian cheng 42,92,331 an la lut tawh a ni. Tomato hi a lei tur ten Chawngtlai khuaah kal chinin an lei thin a, a thar vanglai chuan nikhatah pickup phur 5 atanga phur 7 te an hralh chhuak a, Aizawl leh Lungleiah an hralh hnem deuh ber a, hmun danga hralh pawh thahnem tak a awm bawk a ni. Kumina tomato an hralhna rate hi a hniam lai berin kg khat Rs. 40/- vel niin a san lai berin Rs. 80/- vel a ni.

Tun dinhmunah Chawngtlai khuaa tomato ching chhungkaw zingah hian Chawngtlai Tomato Grower’s Association-a tel hi chhungkaw 103 an awm mek a, kumin kum tir lama tomato an chinte hralh tur la awm bawk mah se, kum tawp lama thar tur an phun chho leh mek a ni.
Chawngtlai khua hian nikum 2024 chhung khan tomato quintal 4672.17 an thar a, an tomato thar atang hian Rs.57,21,300 zet an la lut a. Kumin 2025 chhung hian an tomato te tha taka an thar thei a ni chuan cheng nuai 80 man vel thar chhuah theih an inbeisei a ni.

Pu R Biakhmingliana chuan tomato chin kawngah KVK ten nasa taka hma an lakpui thin thu a sawi bakah PMKSY sheme atangin tomato zamna tur an dawn thin niin a sawi bawk a ni.