Palak Bialtu MLA Pu K. Hrahmo-a’n Mizoram chu Central Base-a a kal ve theih hunah kawng hrang hranga harsatna a tawh te a kiam a rin thu a sawi.

#ZONEWS #POLITICS August 12, 2025:
Nimina BJP Mizoram Headquarters-a Political Session-a thu a sawinaah, Palak Bialtu MLA Pu K. Hrahmo chuan tun hunah hian National Party, BJP aṭang lo chuan hmasawnna a awm thei lo tih a chiang tawh hle a ti a, MNF chuan NDA an zawm inti chung siin, NDA tak takah an inhnimphum duh lova, MNF te’n Sorkarna an siam lai khan NDA-ah awm tak tak ni se chuan, Mizoramin khatianga harsatna kha a tawh a rinawm loh a, SEDP aṭanga sem tur cheng nuai thum (3 lakhs) pawh kha an neih a rinawm a ni ti. Tun Sorkar-ah pawh NDA-a tel tura Central hruaitute’n ZPM an dawr lai khan an zawm duh lova, vawiinah chuan chumi rah chu an seng mek a, ZPM chu issue base a an kal ang bawkin Central sorkar pawhin issue base in Mizoram an enkawl niin a lang a ti.

Pu Hrahno chuan BJP chu a lian tawh hle a, Autonomous District Councils ADC-ah te phei chuan party dangten an huphurh rawn tawh a ti a, tunhnaia Chakma Autonomous District Council By-election campaign in Chawngte a an kal ve thu sawiin, Party pathum- BJP, ZPM leh MNF inbeihna a ni a, an inbeih tawk em avangin boruak a tang hle a ti a, BJP chu chak ngei tura an rin laiin, inthlan result-ah BJP chu vote 9 chauhin an chak zo lo a, hei hi MNF chuan ZPM an vote pui vang a ni a ti a, BJP chu Pathian zarah an lian tawh hle a, ADC-ah te chuan huphurh ber party an ni tawh a, hei vang hian party dangten an beihrawn a, BJP chu beihrawn tlak party an ni ve tawh tih a sawi a ni.