MAMIT-AH RED RIBBON SCHOOL QUIZ COMPETITION – 2025 NEIH A NI

#ZONEWS Mamit August 12, 2025 : Vawiin khan District Level Red Ribbon School Quiz Competition on HIV/AIDS 2025 chu Seminar Hall, Govt Mamit College – ah neih a ni a. Pu K.Lalnunfela, District Education Officer, Mamit District chuan a telpui.

Pu K.Lalnunfela chuan kan ramin faina leh hriselna kawnga changkanna lam kan pan mek laiin natna thalo tam takin min chim chhoh mek a, chung zingah chuan HIV/AIDS umbo tur leh natna laka fihlim tura inzirtirna leh hmalakna nasa taka kalpui niin vawiina zirlai naupangte tan pawha Quiz buatsaih a nihna chhan chu HIV/AIDS do tur leh drug hmansual laka kan fihlim theih nana inzirtirna kalpuina a nih thu a sawi, kan ram leh hnam min run mektu leh thalai nunna tamtak suattu a nih a vangin heng ang laka fihlim tura inveng turin zirlai naupangte a chah a ni.

Dr.Thanmawii, Dy CMO chuan he hun hi kaihruaiin India rama mihring cheng hmun thuma thena hmunkhatte chu HIV/ AIDS chungchangah zirtirna pek tur kan nih angin keini Mizoram pawh heng zingah hian kan tel thu a sawi a, zirlai naupang rilru la thianghlim tak kan nih laiin he natna do tura kan inbuatsaih chu a tul hle a ni a ti. Mamit District Level Quiz Competition-a tithate hian State Level-ah District ai an awh dawn thu a tarlang bawk.

He hunah hian Dr. Lalrintluangi, Medical Officer, ART Mamit chuan HIV/AIDS laka fihlim tura zirtirna a nei bawk.

District Level Red Ribbon School Quiz Competition-ah hian Ms Zonunthari, OA, SDEO Office chu Quiz Master niin Pu K.Lalnunmawia, HEO chuan lawmthusawina a nei bawk a ni.

Vawiin District Level Red Ribbon Quiz Competition – 2025 ah hian lawmman pakhatna latute chu Elizabeth Laldinsangi cl- IX leh Lalhmangaihzuali cl – IX Lengte Secondary School niin pahnihna Lalrinhlui Cl – VIII leh Michael Hmingthansanga, Cl – VIII, Govt M/S I, Mamit te an ni a. Pathumna hi Lalhruaitluanga, Cl – VIII leh Malsawmhlui, Cl – VIII, Govt Agape Middle School, Mamit te an ni. Consolation Prize hi Lalrohlua, Cl-VIII leh Lalrinsangi, Cl – IX Presbyterian English School, Mamit te’n an la bawk.