LAWNGTLAIAH ‘HAR GHAR TIRANGA’ PUALIN KAWNG ZAWH A NI

#ZONEWS Lawngtlai August 13, 2025: India Independence Day vawi – 79 na lawmna peng pakhat ‘Har Ghar Tiranga’  puala kawngzawh chu tukin zing dar 7:00 khan  Chandmary Square atanga Areopagy, Bazar, inkarah neih a ni a. Kawng zawhah hian Lawngtlai khawpui chhunga zirlai  naupang, Zirtirtu leh Sawrkar hnathawk thahnem tak an tel thei a ni.

He hunah hian Pu David Lalrinawma, Addl. DC chuan thusawina neiin, India khua leh tui tan chuan India ram kan hmangaih zia lantirna hun a ni a, rilru leh thinlung taka kawngzawh a tul tak zet a ti a. Zalenna hlut zia tarlangin, zalenna nei tura nunna hlu tak chân tate hrereng turin a sawm a ni. Addl. DC  chuan India ramin British sawrkar atanga zalenna a hmuh chu thil hlu leh ropui tak a nih angin,  Hnam puanzar hmanga hre thar nawn fo tura a duh thu a sawi a. Pu David Lalrinawma chuan Lawngtlai mipuite pawh India ramin zalenna a hmuh an ngaihhlut zia lantir nân a  mahni chenna In theuha Hnam puanzar zar theuh turin a sawm nghal a ni.

Har Ghar Tiranga-  puala kawng zawh hi Chandmary Square atanga tanin, Areopagy, Bazarah tâwp a ni a. Hetah hian Pi Malsawmtluangi, Superintendent, DC Office,  kaihruainain ‘Nasha Mukt Bharat Abhiyaan’  kum-5 na puala  thu intiamkamna (Pledge) sawihona neih a ni bawk.