Home, UD&PA leh DP&AR Minister Pu K. Sapdanga’n Lungleia sawrkar department hotute a kawm

#ZONEWS Lunglei August 16, 2025: Mizoram sawrkara Home, UD&PA leh DP&AR Minister Pu K. Sapdanga chuan nimin chhun khan Lunglei DC Conference Hall-ah Lungleia sawrkar department hrang hrang hotute kawmin, District hmasawnna hna thawh hrang hrang a sawipui.

He hunah hian Lunglei HPC Vice Chairman Pu V. Malsawmtluanga, Lunglei West bialtu MLA Pu T. Lalhlimpuia, UD&PA Secretary Pu Lalmalsawma Pachuau, District Bawrhsap Pi Navneet Mann, DIG (Southern Range) Pu Altaf Ahmad Khan leh sawrkar official-te an tel a. Bawrhsap Pi Navneet Mann chuan Lunglei District-a hma lakna lian leh pawimawh zualte tar langin, department hrang hrang hotute’n an department kal tlanga hna thawh report leh Minister hnena thlen duh an neihte an sawi bawk.

Minister Pu K. Sapdanga chuan inkawm hona chu Lungleia sawrkar department te dinhmun, an mamawh leh harsatnate a hriatpui theih nana ruahman a nih thu sawiin, department hrang hrangte chu an hma zawnah District leh ram hmasawn nan theih tawp chhuah turin a chah a. ATL Road (Aizawl-Thenzawl-Lunglei kawng) siam ṭhat nana sawrkarin sum a dah hmangin hna thawh theih a nih veleh ṭha taka thawk turin PWD hotute chu chahin, Lunglei khawpui tui lakna tihchangtlunna tura AMRUT 2.0 leh SASCI kal tlanga hma lakna pawh ṭha taka thawh zawh thuai a nih a beisei thu a sawi a. Sawrkar hna thawk ruihtheihthil vang emaw, hrisel lohna vang emawa chhawr tlak loh awm chungchangah sawrkarin khauh taka hma lak zel a tum tih sawiin, pension pangngai emaw, special retirement scheme emaw hmanga chawlhtir an nih theih nan department hotute’n khauh taka hma la zel turin a chah a. Home Department hnuaiah ruihhlo vanga buaina tiziaawm turin September thla aṭangin ramri aṭanga ruihhlo lo lut tiping tura beihpui thlak tum a nih thu sawiin, ruihhlo ngaite leh zuarte en zui kawngah pawh khauh zawka hma lak tum a nih thu a sawi.

Lunglei HPC Vice Chairman Pu V. Malsawmtluanga chuan HPC chu Lunglei District tan Planning department peng khat a nih angin, District hmasawnna atana inpui a nih anga ṭha taka thawhpui turin department hotute a sawm a. Sawrkarin ram leh mipuite hmasawnna atana ngaih pawimawh a neih leh a policy te ṭha taka kalpui ṭhin turin a chah bawk.

UD&PA leh P&PI Secretary Pu Lalmalsawma Pachuau pawhin UD&PA hnuaia Lunglei khawpui tana hma lakna tur hmachhawp lian tak tak awmte tar langin, Planning lamah Bana Kaih hnuaiah August 2025 thla tawp aṭangin progress partner tur dilna hun hawn leh tum a nih thu leh District hmasawnna hna thawh nan District Planning Committee-te thuam chak tum a nih thu a sawi.

Home Minister hian District Sainik Welfare & Resettlement Office chu tlawhin, DSW&RO Maj. Rebecca L. Chhakchhuak leh thawktute leh ex-servicemen (sipai bang)-te’n an lo dawngsawng a. DSW&RO chuan District Zila Sainik Board hnuaia sipai bangte hamṭhatna atana hma lakna hrang hrang report pein, Sainik Rest House chei ṭhatna te, martarte hriat rengna War Memorial chei ṭhat leh tuai hnumna leh office mamawh hrang hrangte Minister hnenah hian an lo thlen a ni.

UD&PA Minister Pu K. Sapdanga hian Lunglei Chanmari-a District UD&PA building chu tlawhin, a dinhmun a enfiah bawk a. DUDO Pi Lalhruaitluangi leh thawktute’n lo dawngsawngin, office mamawh hrang hrangte leh Lunglei khawpui tana hma lakna tur pawimawh hrang hrangte Minister leh UD&PA Secretary te hnenah an lo thlen bawk.