Group Art Exhibition chu duh apiangte tlawh theih turin hawn a ni

#ZONEWS Aizawl August 19, 2025: Information & Public Relations Department leh Mizoram Art Development Society (MADS) tangkawp buatsaih, thalai rual thian ho mi paruk intelkhawm – Art of Infinity-te Group Art Exhibition chu vawiin khan Pi C. Lalremruati MIS, Protocol Officer, GAD chuan Art Gallery, Lianchhiari Rûn, Directorate of I&PR, Treasury Square-ah a duh apiangte tlawh theih turin a hawng.

Group Art Exhibition hawngtu Pi C. Lalremruati chuan thalai rualte’n Art Exhibition changtlung tak an buatsaih thei chu chhuanawm a tih thu sawiin, hei hian art lamah Mizote’n hma kan sawn nasat zia a ti lang chiang hle a ni, a ti a. Mizo artist-te kutchhuak lemziak leh kerte hnam dangte’n an hlut thu leh market tha tak a inhawn thu sawiin, Artist-te chu state pawn lama Art Workshop, Exhibition, Competition leh Art Residency-te ngaihvena a tam thei ang ber tel tum turin a chah a. Mizoram Art hmasawnna tura I&PR Department leh MADS te’n thawhhona tha tak an neih thu sawiin, MADS hotute chu Mizoram District hrang hrangahte pawh hmalakna neihpui atan a sawm a ni.

Group Art Exhibition-ah hian Art of Infinity member 6- Zomuanpuia, Roluahpuia, Lalremdika, Lalthansangi, Laldinmawia leh F. Malsawmzuala te kut chhuak lemziak hrang hrang 75, wood carving 1 leh mini painting engemawzah pho chhuah a ni a. August ni 19-23, 2025 chhung hian chawhma dar 10 atanga tlai dar 5 thleng tlawh theih a ni dawn a, lemziakte hi a lei theih dawn bawk a ni.

Vawiin Group Art Exhibition hawnna hun hi Pu Vanlalhriata, President, MADS chuan kaihruaiin inlawmna thu a sawi a. Tv Zomuanpuia hnen atangin report ngaihthlak a ni.