Lungleiah LMC Board of Councillors ṭhut khawm (special meeting) buatsaih a ni

#ZONEWS Lunglei August 19, 2025: Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin Lunglei Convention Centre-a BoC Meeting Hall-ah an ṭhu khawm a. Nominated member pathum – Health & Family Welfare Minister, Lunglei East bialtu MLA Pi Lalrinpuii; Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga leh Lunglei South bialtu MLA Pu Lalramliana Papuia te pawh an tel.

Chairman Pu Lalzuithanga chuan LMC dinhmun leh hma lakna hrang hrang report a pe a. Thu ngaihtuah tur chhawp chhuah pahnih awmin, Vice Chairman Pu K. Lalrinawma’n a sawi fiah a. Sawi ho zui a ni.

BoC ṭhu khawm chuan State Priority Projects (SPP) hnuaia Lunglei Venglaia Tennis Court hlui hmuna ‘Green Park cum Parking’ siamna tura cheng vaibelchhe 5 hu hma lakna tur DPR ruahman chu, a hmun hma leh thil dang chin fel ngai hmabak a la tam deuh avangin leh sum a zuzi (lapse) loh nan, SPP hnuaia hma lakna tur chu Saikuti Hall chei ṭhat nana ruahman zawk ni se tiin lung rual takin an pawm tlang a. Green Park leh Parking tur chungchangah chuan khawpui leh mipui tana ṭha tur thlir chungin, a ṭul anga hma lak chhunzawm dan tur leh, SASCI emaw, scheme dang aṭang emawa ruahmanna kalpui theih dan tur ngaihtuah zel ni se, tih a ni.

BoC ṭhu khawm chuan Lunglei khawpui chhunga faina leh thianghlimna kawnga hma laknaah Solid Waste Management Centre-I-in a ken tel bawlhhlawh bawm sem mek chhunzawmna tur leh Garbage Free City hma lakna chhunzawm nan, Urban Local Body (ULB) Grant 2023-24 1st installment sum bang aṭangin in tina bawlhhlawh bawm sem tur lei ni se, tiin a rel a. Hemi atana mawhphurtu turte pawh inruat nghal a ni bawk.

Chairman-in a sawm angin Health Minister Pi Lalrinpuii chuan thu sawiin, LMC hnuaia Lunglei khawpui mawina tur leh mipuite tana hma lakna hrang hrang awm chu lawmawm a tih thu a sawi a. Ward leh bial hmasawn nan MLA leh councillor-te thawh hona ṭha a pawimawh thu sawiin, councillor-te chu hmasawnna atana sawrkar nawr leh um zui kawngah pawh inthlahrung lo tur leh theih tawp chhuah zel turin a chah.

Chairman report-a a lan danin, State Priority Projects hnuaiah Lunglei khawpui tana pawimawh tur project panga, cheng vaibelchhe 17.50 hu pawmpuina hmuh tawh niin, chu’ng zingah chuan Sazaikawna LMC Complex sakna tur (₹4Cr), Hrangchalkawna Transport Hub sakna tur (₹3.5 Cr), Ramthar AOC-a Market Shed sakna tur (₹2 Cr) leh C. Ṭhuamluaia Muala Multi-Level Car Parking sakna tur (₹3 Cr) te a tel.

Vawiina LMC Board of Councillors ṭhut khawmah hian elected councillor 10 bakah, nominated member – MLA 3 an tel a. LMC Chief Executive Officer Pu Donny Lalruatsanga leh Secretary Pi Zoramdini te’n an telpui bawk.