ILP check post paltlang chauha chhuahtir dan tur ruahman a ni

#ZONEWS Aizawl August 20, 2025: Chief minister Lalduhoma leh Northeast Frontier Railways chief engineer (construction) Vinod Kumar te chu nimin khan CM pisaah an inkâwm. Vinod Kumar chuan, rêl hmanga khualzin thlengte chu chawlhhmun hnuaia kawng (subway)-a ILP checkpost paltlang zelin chhuahtir an nih dawn thu a sawi.

Inkawmnaah hian NF Railways Chief Engineer chuan Sairang rel chawlhhmun awm dan tur a lem nen a sawifiah. A sawi danin, Sairang chawlhhmunah hian platform inkalpawh tawnna tur subway pathum a awm dawn a, flyover bridge a awm dawn lo.

Sairang chawlhhmuna khualzin thleng tharte chu subway aṭang chauhin an chhuak thei dawn a, subway-a inner line permit (ILP) endikna (checkpost) an paltlang zel dawn. Bungraw hlânna platform lamah Mizoram Taxation hmunhma tur dahna hmun siam a ni ang.

Sairang rel chawlh-hmun hi world class station ni tura thuam ṭhat leh tur a ni a, prime minister Narendra Modi-a’n a hmunah a hawng tura beisei niin, chumi atana inbuatsaihnate Chief Minister leh Vinod Kumar te chuan an sawi dun a ni.