Sairang leh Kawnpui inkar kawng siam leh tura ni 3 chhung chhun lamah lirthei tlan chawlh puan a nih hnuah zanin dar 6 atang khan a pangngaia tlan tir leh tan a ni.

#ZONEWS August 20, 2025:
Sairang leh Kawnpui inkar kawng siam leh tura ni 3 chhung chhun lamah lirthei tlan chawlh puan a nih hnuah zanin dar 6 atang khan a pangngaia tlan tir leh tan a ni.

Helai kawngpui chungchanga Single point of contact, Pu TBC Lalvenchhunga MLA chuan kawng a that rei theih nan bungraw phur lirthei ten an phur theih chin aia rit an phur tawh lo nan sorkarin ngaihtuahna a hmang mek a ti a, kawng chhiat chhan chu ruahsur vang a nih rualin bungraw phur lirthei ten an phur theih chin aia rit an phur thin vang pakhat a ni tih a sawi a, quintal 90 phur tur pawhin quintal 200 te an phurh avangin kawngin a dawl zo thin lo a ti a, hetiang a thlen tawh loh nan sorkar chuan ngaihtuahna a hmang mek a, lirthei phur phal chin pawh khauh zawka kalpui a ngai a ti a, Ministry of Road Transport and Highways leh Supreme Court-in kenkawh tur a tih ang chu mi state pawhin an kalpui a, Mizoram pawhin a kalpui a ngai tih a sawi bawk a ni.

Pu TBC Lalvenchhunga chuan kawng chu a tlachawp a siam mek a ni a, lirthei tlan a tam lutuk chuan kawng siamtute hnathawh a tihbuai thin avang leh kawng a chhiat thui chuan khawih leh enkawl a har thin avangin lirthei tlanten kawng siamtute hnathawh an tihbuai lohna turin ni 3 chhung chhun lamah lirthei tlan chawlh an puang tih a sawi a, hetianga an tih zeuh zeuh loh chuan kawng siam ngawt theih a ni tawh lo a ti a, hei hi August ni 9 hma zawnga an kalpui dan ang a nih avangin mipui an buai phah lutuk an ring lo a ti.

Kawng chhiat zualna Silchar atanga kilometre 132, New Khamrang hnuai bakah km 129 Mega food Park bul leh km 125 Kawnpui bulah te a ni a ti a, kawng a khuar chhe leh tawh hle a, lirthei an tang leh tawh a ti a, lung tam tak hmangin hnawh tawh mahse kar 1 vel a liam chuan a chhe hman leh thin a ti a, fur ruah a la tlak reng avangin kawng siam hun a ni rih lova, chuti chung chuan kawng siamthat nan cheng nuai za tel an seng tawh a ti a, working season ah chuan tha zawkin an siam theih a rin thu a sawi a ni.

Lirthei tlan chawlh an puan hian mipuiah nghawng a neih lohna turin ruahmanna dang an siam lo tih a sawi a, Sorkarin lirthei che vel a chhinchhiah danin, Thawhlehni zan khan Kawnpui atanga Aizawl pan bungraw phur engzatmah chhuah an ni lova, Mualkhang/Khamrang atanga Kolasib/Assam lam panin lirthei 530 chhuah a ni thung a, Kawngpui Sairang pengah lirthei 261 leh Sethawnah lirthei 340, avaiin lirthei 601 a tangkhang a mek a, Zanin dar 6 aṭangin dan pangngaiin kawng hi hawn leh phawt tur a ni a, kawng chin, leh khaw chin azirin repair leh ṭhin a ngai maithei tih an sawi a ni.