GST 2.0 IN ‘SIN GOODS” A TIH, 40% GST CHHIAH KHAWNNA TUR HI ENG THILTE NGE AN NIH? – Huna Kawlvawm

GST ruahmanna thar Group of Ministers (GoM) in Finance Ministry rawtna an sawi hoa an pawm chu thlà leh September 2025 bul lam hian GST Council pawm leh ngaihtuah tura thlen a ni ang. GST Council-ah hian state zawng zawng finance minister te, Central Sorkar minister țhenkhat te an tel ang a, hetah hian hman turin a hmawr bawk a ni tawh ang.

Modi Sorkar-in GST ruangam siam ṭhat “next-generation GST reforms,” rawtna a neih Prime Minister Narendra Modi pawhin Independence Day 2025 a lo puan tawh chu a nihna tur leh a hawi tur lam a chiang chho zel a ni.

GST chhiah chungchang ngaihtuah tura din Group of Ministers (GoM) te chuan tun kar Ningani (21/8 /25) khan bungrua leh thil hrang hranga GST chhiah khawn zat tur bithliah dan tur chi hrang 4 awm țhin chu 2 a siam ṭha an ti. GoM hian GST khawnna 12% 28% chu nuai boin hemi aiah 5% leh 18% chauh hman zui turin an rawtna a ni. Mi nawlpui mamawh ni chiah lo “sin goods” an tih țhin; zu, zuk leh hmuam ațanga GST chhiah 40% khawn tura rel a ni bawk.

GST Council hi September 3-4, 2025 hian Delhi an ṭhu tura beisei a ni.

GST chhiah khawn tur zat bithliah thar 5% leh 18 zinga tel lo “sual bungrua” ( “sin goods”) mihringte tan țhatna leh țangkaina nei lo, a loa awm theih thil chungchang hi ngaihtuah tel a ni.

*Sin goods*

Heng “sual bungrua” nia khawvelin a tih mai chu, mihring hriselna ti chhe thei taksa mamawh pai lo, mamawhtu an tam vanga khuahkhirh rem chiah si lo hi a ni. Upa Dingluaia ṭawngkam takin “Vaita (vitamin) pai lo” Khawvel mihring duh si hi a ni. Zu leh zuk leh hmuam chi hrang hrang ațanga chhiah khawn hi “sual chhiah” (sin tax) an ti a, heng thil hi sual thil, bungrua “sin goods” chu a ni.

Sual bungrua leh thil aṭanga chhiah chi hrang khawn lai (GST, compensation cess) mek pawh hi a sang kher mai. Sahdah leh Khaini (chewing tobacco) ațang hian tunah hian chhiah (cess) 160% lak a ni mek a, gutka aṭang hian chhiah (cess) 204% lak a ni. Cigarettes ațang hian GST bakah chhiah chhawng hrang hrang lak a ni bawk. India siam sikret i lei hian chung chhiah chhawng GST, cess, National Calamity Contingent Duty (NCCD) te chu i chawi avangin sikret bawm khat I leina ațanga a tam zawk fe chu heng chhiah hi a ni.

*Car changkang*

Central Sorkar-in GST bithliah dan a rawtna ang chuan a chunga sawi tâk “sual bungrua” bakah hian GST 40% chawi tur zinga rawtna awm chu mamawh zinga chhiar tel chiah loh nawmchenna thil (luxury goods) bakah car man tam leh changkang (high-end luxury cars) te a tel ang.

Suresh Kumar Khanna, Uttar Pradesh Finance Minister chuan heng car ṭha mangkheng te (ultra-luxury cars) leh “sual bungrua” te hi GST 40% chhiah chawi khawnna tura duan a nih thu a sawi.

*Sin Goods ṭe chu*

GST chhiah 40% khawnna tura rawtin a huam turte chu :

Tobacco & Tobacco products Cigarettes, cigars, pan masala, gutka, chewing tobacco, hookah, nicotine substitutes (a hmain 28%) Cess varies — up to 96%

Sugar-sweetened Beverages Aerated water, carbonated drinks, caffeinated beverages 40% proposed (a hmain 28%) 12% (on some items)

Gambling/Betting Lottery tickets, casinos, online gaming/gambling (a hmain 28%)

*Car man to*

Car/SUV 1500cc aia tam, a sei zawng metre 4 aia sei (Vehicles High-end luxury automobiles (SUVs, cars above 1500cc, over 4m length) tuna GST 28% khawn mekna chu GST 40% khawn tura rawt a ni.

*Chaw dangral*

Chaw lam chi – chaw dangral chi hrang hrang sawngbawl sa – thlum leh al, hriak/thau pai tam lutuk (process foods, foods high in sugar, salt, trans fats (e.g fast food, junk food)

tuna 28% pawh 40% ni tura rawt a ni.

*ZU ve thung hi*

ZU ațanga chhiah khawn hi GST hnuaiah a awm lo. Indian Constitution, Article 366(12A) ah hian zu ațanga chhiah khawn hi GST hnuaiah rin luh a ni ve lo. Zu ațanga chhiah khawn hi state thu neihna a ni. India state hrang hranga zu hralhna aṭang hian chhiah (excise duty) khawn a ni ṭhin a, chhiah khawn tur zat bithliah chu State thu neihna a ni a, hemi avang hian zu thuhmun reng si state hrangah hralhna man a inang lo zung reng a ni.

RBI figure-in a sawi dan chuan heng state hian zu hralhna ațanga kum 2022-23 chhunga sum hmu tam, an state sum hmuh ( state own tax revenue) 20% chung lam hmu tling an ni : Karnataka (22.9%) Punjab (21.2%) W Bengal (21.8%)

Zu aṭanga chhiah (excise duty, VAT) khawnna bithliah sang zingah state lian leh chhiah khawn tam Maharashtra, Karnataka, Punjab, Tamil Nadu, Kerala, U. P te niin, an chhiah khawn zat hi 50% – 80% on MRP a ni.

Source :
Money Control
AUG 21, 2025
RBI, ET Analysis
========23082025
Huna Kawlvawm