Lungleiah sawrkar ukil leh hnu chhuitu police te’n hnu chhui kawnga thil pawimawh hrang hrang an sawi ho

#ZONEWS Lunglei August 25, 2025: August ni 22, 2025 (Zirtawpni) khan Lunglei SP Conference Hall-ah Lunglei District Court-a sawrkar ukil (public prosecutor)-te leh Lunglei Police-a hnu chhuitu, case investigating officer (Case I/O) te’n inkawm hona (joint interaction) hun an hmang a. India rama dan bawhchhiatna leh a hremna dan thar, ‘New Criminal Law’ chungchang leh dan bawhchhiatna a thlena hnu chhuina (case investigation) kalpuinaa hriat tur leh zawm tur hrang hrangte zir ho niin, hnu chhuina kawnga fimkhur leh ṭan lak ngaihna laite sawi ho a ni bawk.

He hunah hian Lunglei District Court-a Public Prosecutor (PP) Pu Malsawmdawngliana chuan sawrkar ukilte’n Lunglei District Court-a thubuai an chin fel dan report pein, tuna Lunglei District Court-a sawrkar ukil thawk lai mi pariat te khawih thubuai 613 zinga 444 chu chin fel a nih tawh thu a tar lang a. Chu’ng zinga 410-ah chuan sawrkar ukilte hian hnehna changin, thubuai 34-ah a chak lo zawkah an ṭang thung a ni.

Inkawm hona hun hman zawh hian Lunglei District Superintendent of Police Pu J. Lalmuankima hovin Lungleia thubuai chin fel loh (case pending) la awmte sawi ho a ni a. He’ng thubuaite hi chin fel a nih thuai theih nan hnu chhuitu Case I/O-te chu a ṭul angin hma lak dan tur kawhhmuh an ni.

Kumin 2025 chhung hian Lunglei District-ah dan bawhchhiatna kaihhnawih thubuai 141 ziah luh tawh niin, 108 chu chin fel a ni tawh a, chin fel loh 33 a la awm. Ruihhlo kaihhnawihah ND&PS Act hnuaiah case 14 ziah luh a ni a; Heroin No. 4 gram 1,733.44, a hlut zawng ₹52,08,780 hu man niin, a kaihhnawihah mi 25 man an ni. Zu kaihhnawihah MLP Act hnuaiah case 22 ziah luh niin, zu hi litre 2,934, a hlut zawng ₹30,79,400 hu man a ni a, a kaihhnawihah mi 32 man an ni bawk.