RINNAA KAN PEN CHHUAH HIAN, PATHIANIN A THILTIHTHEIHNA LEH RUAHMANNA NEN MIN LO HMUAK THIN

#ZONEWS #FIANRIAL AUGUST 26, 2025:
RINNAA KAN PEN CHHUAH HIAN, PATHIANIN A THILTIHTHEIHNA LEH RUAHMANNA NEN MIN LO HMUAK THIN

Vawiin kan fianrial hunah chuan Estheri’n a mite chhanhim tura huaisen taka a hmalakna chanchin kha ngaihtuah leh teh ang. Persia lalram pumpuia Juda-te chu an nunna atana hlauhthawnawm leh thih vek hmabakin an awm mek a. Lang lo lama Pathian kaihhruaina nen Estheri chuan Lal Ahasuera chu thihhuamin a hmu a. Lal leh Hamana chu a zawnin ruaitheh turin a sawm a, ruaitheh vawihnihnaah chuan a mite thah vek tumtu Hamana thiltum chu lal hnenah a hrilh ta a ni. Pathian ruahmanna hnuaia a huaisenna leh finna chuan Judate chu a chhandam ta a ni.

ETHERI’N A MITE A CHHANHIM
Tun hun anga i ngawih mai mai chuan, hmun danga Juda-te tan himna leh chhuahna a lo awm pawhin, nang leh i pa chhûngte chu kan boral ang. Lal nihna i lo chan hi hetih hun atân ngei hian a ni dawn lawm ni?” va ti tûrin a tir a (Estheri 4:14).

Nangmah leh i chhungte emaw, nang leh midangte hmalam hun hril thei thiltih ngai dinhmunah i ding ve tawh thin em?

Hamana’n Juda-te tihchhiat vek tuma a phiar thu a lo hriat chuan Estheri chu dinhmun khirhkhan tak maiah a ding a. A chhan letna erawh chu fing taka thil tih leh rinna nghet tak nena hmalakna hmangin a ni.

Rinna leh huaisenna nen engtin nge dinhmun harsa leh khirhkhan takte kan hmachhawn ve theih ang?

Estheri chuan sawm loha lal hmuh tumin bul a tana, dinhmun hlauhawma indahin a pen chhuak a ni. Persia danah chuan, lalin a tiang a lamah a rawn phar chhuak a nih ngawt loh chuan thih mai theihna a ni. Nimahsela, Estheri’n Pathian a rin tlatna chuan huaisenna a pe a, chhan neiin Pathianin a dinhmunah chuan a dah a ni tih a ring nghet tlat a, a mite tan hmalam panin huaisen takin a pen chhuak ta a ni.

Chona tihbaiawm leh hlauhawm tak ni a lang kan hmachhawn changin hma lam pan zel turin eng tin nge hma kan lak ve theih ang?

Estheri chuan lal leh Hamana chu a ruaithehnaah a sawm ta a. Midangte tihlawmna tura a thiltih chuan a thiltum diktak tihlawhtling turin kawng a hawnsak a ni. Ruaitheh vawihnihnaah chuan, a mite chhanhimna atana a nun thapin, lal hnenah chuan Hamana suahsual thiltih tum rapthlak tak mai chu huaisen takin a hrilh ta a ni.

Fiahna kan hmachhawn thinte kara min hruaichhuaka min kaltlangpui thei turin Pathian hi kan ring tawkin rintlak niin kan hria em?

Pathian kut chu hmuh theih loh mahse a awm reng a ni tih Estheri chanchin hian min hriat nawn tir leh a ni. A huaisenna leh fing tak maia a thiltihtur ruahmanna a siam hian rinna leh thiltih a kalkawp a ni tih chiang takin a lantir a ni. Estheri thiltih chuan Hamana chhiatna leh Juda-te chhandamna a rawn thlen ta a, A thiltum tihlawhtling turin tute mai pawh hi Pathian chuan a hmang thei vek a ni tih hei hian a tarlang chiang hle.

Vawiina kan nun hi han en ila. Rinna nena huaisen taka pen chhuah kan ngaihna te a awm ve em? Estheri hnena a awm ang chiah khan, Pathian hi kan hnenah a awm a ni tih i ring tlat ang u. Kan thuawihna leh huaisenna chuan, keimahni tan chauh ni lovin kan bul vela awmte tan pawh nghawng tha leh ropui tak a nei thei si a.

NGUN TAKIN INNGAIHTUAH ILA!
Kan nuna Pathianin huaisen taka pen chhuaka, hma laa, thil ti tura min kohnate ngun takin ngaihtuah ila. Kan aw leh huaisenna mamawh, chona emaw, thil dik lo leh fel lo emaw, kan au chhuah pui ngaite a awm em?

Estheri’n rinna leh huaisenna min lo entir tawh kha ngaihtuah ila. A tana chhan neiin Pathianin min dah a ni tih hriain, rinnaa pen chhuak ve zel thei turin Pathian hnenah chakna leh a kaihhruaina i dil ang u.

Pathian kaihhruainaa kan thiltih chuan, kan bul vela awmte tan rah tha tak leh malsawmna a thlen thei a ni tih ring tlat ila. Kan vel a mite tana huaisen taka Pathian khawngaihna hmanrua ni turin inhlan thar ang u.

ṬAWNGṬAINA
Chutichuan, lal Ahasuera chuan a ram leh tuifinriat thliarkarte chu chhiah a chawitir a (Estheri 10:1)

Aw Lalpa, Mordekaia leh Estheri finna ang kha neih ve ka duh e. Hmelma pa laka I fate ka humhim theihnan ruahmanna fing tak min pe ang che. Estheri chanchina kan hmuh ang hian, I fate harsatna hrang hrang sut kian sak thei turin finnain min thuam la. Nangma hminga harsatna sukiangtu ka lo nih theih nan, Nangmah atanga chhuak finna nen chuan tihtheihloh engmah a awm si lova. I thuthianghlim ka chhiar leh ngaihthlakte hmangin min thuam thar zel a, awpbeha awmte tana thlarau zalenna puang zel thei turin min pui ang che. Nangmahah chuan zalen kan ni vek si a, Isua hmingin ka dil e, Amen!