PHE MINISTER-IN VAIVAKAWN – ZOHNUAI LEI TLA HNIAM AVANGA TUI PIPE CHHIA SIAMTHAT HNA KALPUI DAN TUR A ENPUI

#ZONEWS Aizawl August 28, 2025: Nizan khan Vaivakawn – Zohnuai lei tla hniam avanga 37 MLD, Setlak atanga tui lak chhohna pipe chhia siamthat hna bultanna tur a ruahmanna chu Prof. Lalnilawma, Minister, Public Health Engineering Department chuan a hmun ah a enpui a. Pu Lalnghinglova Hmar, Minister, Sports & Youth Services, Pu Lalmuanpuia Punte, MLA, Adviser to Chief Minister te bakah Pi Teresy Vanlalhruaii, Secretary, Pi Zodinthari, E-in-C, Er. Ngentluanga, CE leh PHED a thawktu dangten an tawiawm a. Er. Robin Lalrinawma, CE, PWD, Pu Zoramsiama Hmar, Addl. DC, I&PR, SIPMUI a thawktute leh khawtlang hruaitute an tel bawk a ni.

Prof. Lalnilawma, PHED Minister chuan Aizawl chawm tura hmalakna lian tak, 37 MLD Setlak chu tangkai taka hman tan a nih hnu ah, Vaivakawn – Zohnuai lei tla hniam avangin pipe engemaw zah kal dan thlak a ngaih thu sawiin mipuiin kan mamawh ang tui kan chan theuh theih nan he hmalakna hi rang taka kalpui tum a nih thu a sawi a. Lei tla hniam lai ah heng pipe-te hi phum tawh lovin, kawng chungah kal tir a nih tawh tur thu a sawi a, ‘Over -ground pipe’ hi metre 80 vel a thui a nih tur thu leh hna kalpui tan a nih atangin ni 30 chhung vela zawh hman beisei a nih thu a sawi.

Tum engemaw zah, khuarel chhiatna hrang hrang thleng avangin Vaivakawn – Zohnuai khawtlang hruaitute leh chhanchhuah leh chhawmdawl hna thawktu Sawrkar department hrang hrangin inrawntawnna hun an neih hnuah, harsatna sutkianna tura inhmuhkhawm a ni chu Sports Minister Pu Lalnghinglova Hmar chuan lawmawm a tih thu a sawi a. Khawtlang himna tur leh Aizawl mipuiin tui hnianghnar zawk an hmuh theihna tura ruahmanna chu hlawhtling ngei tura a duh thu a sawi.

PHED thawktute tarlan danin 37 MLD Setlak, Phase III atanga Laipuitlang reservoir inkar tui pump chu, Vaivakawn – Zohnuai lei tla hniam avangin June ni 2 atang khan tui pump tih tawp a ni a. Lei tlak hniamna lai, metre 80 vela thui ah hian Over – ground Pipe, kawng chungah tui pipe hi kal tir a ni tawh dawn a ni. Pipe len zawng hi 711 diameter a ni a, a chhah zawng hi 8.7 mm niin a thui zawng hi metre 6 zel a ni. Pipe siam hna hi Eco Protection Engineers Pvt. Ltd. ten an thawk dawn a ni.