HEALTH MINISTER-IN ‘3 DAY REGIONAL REVIEW MEETING ON MALARIA ELIMINATION FOR GFATM PROJECT STATES’ HAWNNA HUN A HMANPUI
#ZONEWS Aizawl, October 7, 2025: Health & Family Welfare Minister Pi Lalrinpuii chuan vawiin khan Assembly Annex Building Conference Hall-a National Vector Borne Disease Control Programme (NVBDCP), Health & Family Welfare Department buatsaih, ni thum awh tur, ‘3 Day Regional Review Meeting on Malaria Elimination for GFATM Project States’ hawnna hun chu khuallian niin a hmanpui.
Khuallian Pi Lalrinpuii chuan hmun hrang hrang atanga meeting chhimtute lawmin, he review meeting hi Mizoramin vawi 5 a thlenna a nih thu a sawi a. Mizoram chu India rama malaria vei awm tamna ber a nih avangin tihrem kawngah tha thara beih a ngaih thu sawiin, Mizorama district 4 te chu Category 3 – High Endemic an la nih thu leh malaria vei tharte zinga zaa 80 dawn chu he’ng district atanga hmuhchhuah an nih thu a sawi a. Inhrilhhriatna tha neih leh invenna a pawimawh tih a sawi a ni.
Health Minister chuan nikum aiin kuminah malaria kai leh thihpui tlem deuh mah se hmun dang nena khaikhin chuan ngaihmawh tham a la ni, a ti a. Malaria natna do kawnga hmatawng tur, health worker 100 lak tum mek a nih thu sawiin, malaria do kawnga sawrkar hmalaknate a tarlang a. He natna do tur hian khawtlang leh NGO-te nena tanrual a ngai a ni, tiin, he meeting kaltlang hian kan ram thlen chin enfiah a nih a, malaria natna nuai bo dan tur tha zawk leh chak zawk duan a nih theih nan duhsakna a hlan a ni.
Pu H. Lalengmawia, IAS, Health Commissioner & Secretary pawhin thu sawiin sawrkarin healthcare sector chu a ngai pawimawh hle a ni, a ti a. Sawrkar chuan thawktu, hmanrua, leh hotu lamah he sector hi thuam thain, mumal zawkin transfer and posting mai bakah MUHCS a kalpui bawk tih kalkhawmte chu a hrilh a. He review meeting hian malaria do kawnga Mizoram thlen chin a zirchian a, tan lak dan tur a duan chhuah a beisei thu a sawi a ni.
Hawnna hunah hian Dr. Lily Chhakchhuak, Mission Director, NHM chuan kalkhawmte lawmna thuchah a sawi a. Dr. Pranab Jyoti Bhuyan, Addl. Director, NCVBDC chuan he Regional Review Meeting thil tumte sawiin, Global Fund hnuaia hnathawhte enlet leh High Endemic District-te tana hmalak dan tur ruangam duan an tum ber thu a sawi a. Malaria chungchanga Mizoram dinhmun a tarlang bawk a. Dr. Vanlalfela, Director of Health Services chuan lawmthu sawiin hun a khar a ni.
Regional Review Meeting (RRM) hi kum tin thla thum danah (Quarterly) neih thin niin, Global Fund for AIDS, Tuberculosis, Malaria (GFATM) Projected States-a tel, North-East State pasarih (7) (Assam, Meghalaya, Tripura, Nagaland, Arunachal Pradesh, Manipur, Mizoram) bakah Jharkhand, Odisha leh Chhatisgarh-ahte huaihawt thin a ni a. He’ng state 10-te atang hian Vector Borne Disease Control Programme a Programme Officer te, Regional Director te, leh Consultant te bakah World Health Organisation (WHO), National Institute of Malaria Research (NIMR), Vector Control Research Centre (VCRC), Transport Corporation of India (TCIF) leh Govt of India atanga mithiamte’n he hun hi an chhim thin a.
State hrang hrang atanga VBD lama thawktu mi 70 vel he hunah hian an rawn tel a. He meeting, ni 3 chhung awh turah hian India rama Malaria natna umbo a nih theih nana hmasawnna tur zirhona hun neih a nih dawn bakah Malaria tihremna kawnga Programme hmalakna hrang hrangte thlirhona neih thin a ni.
Tun dinhmunah Mizoram chu India rama Malaria tamna ber state ni mekin, District 4 – Lunglei, Lawngtlai, Mamit leh Siaha-te chu Malaria tamna district an ni a. Kumin 2025 Jan – Sept thla chhung khan Mizoramah Malaria vei mi 7321 hmuhchhuah tawh niin, Malaria avanga nunna chan mi 6 an awm tawh bawk. Nikum, kum 2024 Jan – Dec chhungin Malaria natna hmuhchhuah zawng zawng mi 16899 niin, nunna chan mi 7 an awm bawk.
India sawrkarin kum 2030-a India ram Malaria natna awm tawhlohna rama siam a tum mek angin Mizoram sorkar pawhin State dangte rualin ke a pen zel a. Sawrkar hmalakna chi hrang hrang – Indoor Residual Spray (IRS), daily usage of ITN/LLIN te, vector control measures bakah personal protection lama mipui zirtirna IEC/BCC lamah tan a la a ni. Tin, NHM/Health Department hmalaknain Intersectoral Convergence atan Mizoram sorkar department hrang hrangte nen thawhhona kawngah hma a la mek zel bawk.
MALARIA-
| Year-wise malaria case incidence from 2022 – 2025 (Till September) | ||||||||
| 2022 | 2023 | 2024 | 2025 (Jan-Sep) | |||||
| District | No of case | Death | No of case | Death | No of case | Death | No of case | Death |
| Aizawl East | 20 | 0 | 29 | 0 | 30 | 0 | 77 | 0 |
| Aizawl West | 43 | 2 | 74 | 1 | 41 | 0 | 93 | 0 |
| Lunglei | 2354 | 2 | 1286 | 3 | 3775 | 0 | 1788 | 0 |
| Siaha | 933 | 0 | 1609 | 0 | 1607 | 0 | 1080 | 0 |
| Kolasib | 22 | 0 | 29 | 0 | 16 | 1 | 24 | 0 |
| Mamit | 1474 | 0 | 3288 | 1 | 3299 | 1 | 1037 | 0 |
| Champhai | 46 | 2 | 42 | 1 | 31 | 0 | 33 | 3 |
| Lawngtlai | 4775 | 3 | 7927 | 6 | 8067 | 5 | 3151 | 3 |
| Serchhip | 28 | 1 | 48 | 1 | 33 | 0 | 38 | 0 |
| Total no of cases | 10229 | 10 | 18005 | 13 | 16899 | 7 | 7321 | 6 |
A hnuaia tarlante hi Dr. Pranab Jyoti Bhuyan, Addl. Director, NCVBDC report atanga lak a ni:
| Status of malaria cases- State wise (Jan-Aug 2025) | |||
| State | Positive Cases | Pf% | Death |
| Odisha | 52462 | 69.93 | 6 |
| Jharkhand | 23808 | 77.07 | 2 |
| Chhattisgarh | 19149 | 87.57 | 0 |
| Maharashtra | 13858 | 41.29 | 14 |
| Mizoram | 6975 | 55.90 | 7 |
| Tripura | 5127 | 59.76 | 0 |
| Assam | 2510 | 14.14 | 6 |
| Meghalaya | 286 | 84.62 | 0 |
Discover more from Zonews
Subscribe to get the latest posts sent to your email.
