LAWNGTLAIAH RTI WEEK HMAN A NI

#ZONEWS Lawngtlai, October 8, 2025 : Vawiin khan Deputy Commissioner Office, Lawngtlai bultumin DC Conference Hall-ah ‘RTI Week’ hmanna neih a ni a, Pu Donny Lalruatsanga, Bawrhsap chuan khuallin niin a hmanpui.

Pu Donny Lalruatsanga chuan kalkhawmte hnena lawmthu sawina a nei hmasa a. RTI chungchangah kum tin intahhriarm a tul hle a, a bik takin ‘information’ pek chhuah theih leh theih loh te hriatchian a tul hle a ni, a ti. Sawrkarin mipuite a dah pawimawh hle tih hriatnawn fo a ngai a, mipui vanga sawrkar awm a nih avangin mipuite tan a theihtawp chhuaha thawh hi sawrkar hnathawkte mawphurhna a ni, a ti. Langtlang sawrkar siam tur te, Sawrkarin sum a hmanna leh hmalaknate RTI hmanga zawh theih reng a nih angin mipuite hmang tangkai tura a duh thu a tarlang a ni.

Bawrhsap chuan RTI Act hnuaiah dan ang thlapa thil kalpui turin State Public Information Officer (SPIO) leh State Assistant Public Information Officer (SAPIO) te an pawimawh hle tih a sawi a. Hun tiam chhunga chhanna pe tur leh information – dil ang angte dik taka chhang tura inbuatsaih turin a chah a. RTI chhawr tur ber chu mipuite an nih angin inzirtirna pawh uar zawka kalpui a tul hle tiin, mipuite chhawr tangkai turin a sawm nghal bawk.

Pi Malsawmtluangi, Superintendent, DC Office chuan RTI Week pualin RTI chungchang inzirtirna hun a hmang a, zawhna leh chhanna hun hman nghal a ni bawk.

Vawiin hun hmanna hi Pu David Lalrinawma , Addl. DC chuan kairhuaiin; Lawngtlai District chhunga State Public Information Officer (SPIO), State Assistant Public Information Officer (SAPIO), NGO leh MJA Lawngtlai te an tel thei a, Pu H. Zonunmawia PD ( DRDO) chuan lawmthu sawina neiin hun a khar.

Written by: Zonunchama Ralte, MIS, DIPRO – LAWNGTLAIDated: 8^th Oct 25 4:32 PM

<< PREVIOUSNEXT >>

INFORMATION & PUBLIC RELATIONS DEPARTMENT

SITE STATISTICS SINCE 2006

Total Visitors

15,81,335

Total Pageviews

16,02,561

Powered By Google Analytics

PRESS RELEASE ARCHIVES