Zin kawnga insuamna thleng chungchanga Lunglei District Police thu chhuah

#ZONEWS Lunglei October 8, 2025: Vawiin khan Lunglei District Superintendent of Police Pu J. Lalmuankima chuan a hnuaia mi ang hian zin kawnga insuamna thleng chungchanga Lunglei District Police hma lak dan leh mipuite hnena hriattirna leh ngenna a chhuah.

Dt. 30.09.2025 zan dar 8:00 leh dar 9:00 inkarah Mongkhoisu (62) s/o Uma Hmuiao of Prabrarang, Rakhine, Myanmar leh ṭawng lettu atana a hman, Teatei Mong Tongchangya (45) s/o Radha Mohan Tongchangya of Longpuighat, Lawngtlai District te chu Mahindra Pik-up Maxx (White) B/R MZ-07A-0106 hmangin, motor neitu leh khalhtu Sujit Chakma (36) s/o Chandrajit Chakma of Kamalanagar-II, Lawngtlai District nen Silchar pan turin Lawngtlai aṭangin an chhuak a. Lunglei District khua Zotuitlang leh Haulawng inkara an tlan laiin, kawng laiah mi tu tih hriat loh mi panga (5) vel hmai tuamte’n pistol nia hriat leh chemte kengin an lo tiding a. An chuanna lirthei chu a windshield an tihchhiatsak a, Mongkhoisu-a bag ah lai chhunga pawisa fai cheng nuai 10 leh document bakah, Teatei Mong-a mobile phone leh pawisa ₹10,000/-, driver Sujit Chakma mobile phone leh pawisa ₹5,000/- chu hriamhrei hmanga vau betin an lo chhuhsak a.

Report an dawn angin, hemi chungchangah hian thil thlenna hmun chu Lunglei Police te’n tlawh nghalin, evidence awm thei ang te enfiahin, a ṭul anga hma lak zui nghal a ni a. Lunglei PS C/No. 161/25 Dt.06.10.2025 u/s 310(2) BNS ziah luh a ni.

Theih tawpin he’ng pawi khawihtute hi man a nih vat theih nan hma la nghalin, heng mi pali – (1) Mithun Chakma (37) s/o Purnyo Chandra Chakma of Udalthana-I, Lawngtlai District; (2) Subaranta (40) s/o Jubhamoni of Ajasora, Lawngtlai District, P/A Thingkah, Lawngtlai; (3) Sandip Kumar Chakma (21) s/o Tirkana Chakma of Borkolok, Lawngtlai District, P/A Thingkah, Lawngtlai; (4) Sujit Chakma (36) s/o Chandrajit Chakma of Kamalanagar-II, Lawngtlai District te hi man an ni tawh a. Chhui chian zelnaah driver Sujit Chakma (motor neitu) hi a inhnamhnawih ngei a ni tih hriat a ni bawk a. Hei hi ruahman lawk sa (pre-plan) fel tak hnuaia thil thleng a ni tih hriat a ni bawk.

Pawi khawihtu paruk te zingah hian mi pahnih Santi Prasad leh Niramodin Chakma te hi tlanboin, anni hian pawisa hi an la kawl nia hriat a ni a; man tura theih tawp chhuah mek a ni. Heng mi pahnih (thlalak enclosed) te hi an awmna chin hria leh lo hmute chuan Police Station hnai berah a rang thei ang bera hriattir vat turin Lunglei Police hotute’n an ngen a. Hemi case hnamhnawihah hian Mahindra Bolero Pik-up Maxx (white) B/R MZ-07A-0106 leh pawi khawih nana hman scooter Suzuki Access B/R MZ-01W-2872 man tawh a ni.

Bungraw keng sumdawngte leh mipui zin veivakte’n harsatna kan tawh lohna turin pawisa tam tham keng lo turin Mizoram Police hotute’n mipuite min ngen bawk.