Champhaiah National Wildlife Week vawi 71-na kharna hun hmang

#ZONEWS Champhai, October 8,2025: Vawiin Chawhnu dar 1.00 khan Champhai Forest Division leh Champhai Higher Secondary School te chuan 71st National Wildlife Week kharna hun Multipurpose Hall, Govt Champhai College-ah an hmang a. Pi Lalrammawii, Honorary Wildlife Warden, Champhai District chuan programme kaihruaiin, Pu Lalbiakchama Chawngthu DFO, Champhai chuan Keynote Address a pe.

Pu Rongura Hrahsel, IPVM National Awardee chuan Power Point Presentation hmangin Environment humhalh chungchangah zirtirna a pe a, kumin Wildlife Week Theme atan ‘Human -Animal Co-existence’ tih chu thlan a ni a. Mihringte leh nungcha te in mamawh tawn kan nih dan leh mihringte dam khawchhuahna atana nungcha chitin rengte pawimawhna hrang hrang uar taka inzirtirna hun hman a ni.

Champhai District-ah pawh kumin Wildlife Week lawmna chi khat atang ‘On spot Painting Competition’ chu Govt. GM Higher Secondary School-ah High School leh Higher Secondary School zirlaite tan buatsaih a ni a. Lawmmnan 1-na dawngtu Lalzarmawii, Class XII (Science) Einstein Higher Secondary School chuan Certificate leh Rs 8000 dawngin, Lawmman 2-na dawngtu H.T Malsawmtluangi, Class X Govt. Ruantlang High School chuan Certificate leh Rs 5000/- a dawng a, Lawmman 3-na dawngtu Emily Hmingthansiami, Class X Academy of Arts & Science chuan Certificate leh Rs 3000/- a dawng a ni. Hei bakah hian mi 3-hnenah consolation Prize pek an ni bawk. He Painting Competition-ah Champhai District chhunga school hrang hrang 9 atangin zirlai 53 an tel a ni.

Vawiin 71st National Wildlife Week kharna programme-ah hian EFCC department a thawkte leh Champhai HSS zirtirtute leh naupangte atangin mi 150 vel an tel a ni.