Khawzawlah RTI Week pualin hun hmang

#ZONEWS Khawzawl October 10, 2025 : Vawiin khan Khawzael DC Conference Hall-ah RTI (Right to Information) Week pualin hun hman a ni a, Bawrhsap Pu K. Vanlalthiana chu khuallian a ni.

Khuallian Pu K. Vanlalthiana chuan RTI hi mipuiin sawrkar department-a hnathawk hrang hrang te a endikna pawimawh tak a ni a, ram inrelbawlna atana thil tangkai tak niin thatchhiatna te, eirukna te leh thil tha lo hrang hrang a veng thei a ni tih a sawi. Mipuiin an hman thiam a ngai a, sawrkar hnathawk te pawhin mipuiin min tihbuai tumnaa ngai lovin thawhpui tumnaa ngai zawkin tha takin dawnsawn ngei a tha tih a sawi bawk. RTI Week hman hi RTI chungchang intuaithar nan leh rilrua vawn that nan hmang ngei turin mipuite a fuih bawk a ni.

He hun hi District Information & Public Relations Officer Pu Lalzara chuan kaihruaiin Election Officer Pu Timothy R. Lalhmangaiha’n RTI chungchang sawifiahna hun PowerPoint presentation hmangin a nei a, RTI thiltum te, a hman theih dan te leh RTI Act hnuaia thil pawimawh hrang hrang a sawi a ni. Sub-Headquarters YMA President Pu PC Rosiama’n lawmthu sawiin hun a khar a ni.

He hunah hian department hrang hranga RTI dilna dawngsawngtu, State Public Information Officer (SPIO) leh State Assistant Public Information Officer (SAPIO) te, Village Council member te, YMA, MHIP, MUP leh MJA member te an tel a ni.