GAD Principal Secretary Pu Sudhir Kumar leh Vigilance Secretary Dr YLN Reddy ten Serchhip an tlawh

#ZONEWS Serchhip, Octobe 11, 2025 : Vawiin khan GAD leh EF&CC Principal Secretary Pu Sudhir Kumar leh Vigilance Secretary Dr YLN Reddy te chuan Serchhip an tlawh a. Serchhip DC Pu Paul L Khuma leh District Administration hotuten Bawrhsap Bangla-ah an lo dawngsawng a ni.

Principal Secretary leh Secretary te hian Serchhip District chhunga sawrkar hmalakna hrang hrangte review meeting an neihpui nghal a. Serchhip District chanchin tlangpui leh sawrkar scheme an kalpui dan te report niin DRDO Project Director Dr Malsawmtluanga Fanchun chuan Mahatma Gandhi National Rural Employment Guarantee Scheme hnuaia hma an lakna tlangpui a sawi a. Election Officer Pi Vanlalchhanhimi chuan Special Intensive Revision (SIR) an kalpui dan report a pe a. SDC leh Master Trainer ni bawk Dr Marilyn Lalruatkimi chuan Adi Karmayogi Abhiyan hnuaia Serchhip khaw chhunga leh thingtlang khaw hrang hranga training an neih dan te a sawi bawk.

Hemi zawh hian GAD Principal Secretary Pu Sudhir Kumar leh Vigilance Secretary Dr YLN Reddy te hian Serchhipa Circuit House sak mek a hmunah an tlawh a. Compensatory Afforestation Management & Planning Authority (CAMPA) Fund atanga hnathawh Entlang Social Forestry an tlawh bawk.

Vawiin vek khan sawrkar mi pawimawh pahnihte hian Serchhip chhuahsanin Lunglei an pan leh nghal a ni.