Khawzawlah NALSA hnuaia scheme zirchianna leh hmeichhia VC tana training buatsaih

#ZONEWS Khawzawl 17th October 17, 2025: Vawiin khan Electric Veng YMA Hall-ah Mizoram Legal Services Authority leh All Mizoram Elected Women Representatives (AMEWR) tangkawp chuan NALSA hnuaia scheme zirchianna leh hmeichhia VC tana training (Special Campaign on Schemes of NALSA and Capacity Building & Leadership Training for Elected Women Representatives of Khawzawl District) a buatsaih a, Khawzawl Bawrhsap Pu K. Vanlalthiana chu khuallian niin Gauhati High Court, Aizawl Bench Jt. Registrar Pi Cacy Malsawmtluangi chu khual zahawm a ni.

Khuallian Pu K. Vanlalthiana chuan hmeichhia te chu an pawimawh zia sawiin khawtlangah pawh hian hmeichhia te chuanin an thawh hlawk zia leh hmeichhe telnaah chuan hna a kal chak thu a sawi a, hmeichhia te chu tan la zela khawtlang leh kan ram tana an theihtawp chhuah zel turin a beisei thu a sawi a ni. He hun a lo kal khawm zawng zawng te chuan an vawiin an zirtur zawng zawng te chu an hlawkpui ngei a beisei thu leh a theih ang anga hmang tangkai turin a beisei thu a sawi a ni.

Khual zahawm Pi Cacy Malsawmtluangi chuan in Hmeichhiaten harsatna an tawha dan hnuaiah an dikna chanvo haichhuak tura hmalakna kalpui dan te, pawikhawihna leh sualna chi hrang hrang, dan bawhchhiatna thleng thinte chu inchhungkhurah nun kawng dik inzirtir lamah tanlak a tul thu te, hmeichhiate chunga hleilenna thleng thei leh thleng thinte pawh tanrualna atangin tihziawm theih a nih thu te a sawi a. Dan hnuaiah hmeichhiate chu hungbik nimahse, midang laka hleilennan hman erawh dan bawhchhiatna a nih thu a sawi a. Hmeichhiaten an dikna chanvo hrang hrang danin a pekte a sawi a, harsatna an tawhin huai taka an dikna chanvo haichhuak tura pen chu hmeichhiate tihtur a nih thu te a sawi.

He hun hi AMEWR President Pi R. Zomuanpuii chuan a kaihruai a, chawhnuah Advocate Pu Solomon Hrahsel chuan NALSA scheme hrang hrang chungchang zirtirna hun a hmang. Khawzawl Police Station Sub-Inspector Pu C. Biakthianghlima’n dan leh thupek kenkawhna chungchanga hriat tur leh police hnathawh puih theih dan tur a sawi a, SCERT Sr. Faculty Pu Zomawia Hauhnar chuan khawtlang rorelnaa thlantlinte tana mawhphurhna a sawi bawk a ni.