Lunglei South bialtu MLA Pu Lalramliana Papuia’n Pu C. Chhuanvawra hnenah MAL Jt Hqrs Lunglei buatsaih Pu Buanga Award a hlan

#ZONEWS Lunglei October 17, 2025: Mizo Academy of Letters (MAL), Joint Headquarters, Lungleiin Mizo thu leh hlaa thawh hlawkte hnena kum 3 dana an hlan ṭhin, “Pu Buanga Award” chu vawiin, October ni 17, 2025 (Zirtawpni) khan Pu C. Chhuanvawra hnenah an hlan a. Hlanna inkhawm hi Lungleia Art & Culture Auditorium-ah buatsaih niin, Lunglei South bialtu MLA Pu Lalramliana Papuia chuan Pu Buanga Award hi a dawngtu Pu C. Chhuanvawra kutah a hlan.

He huna khuallian Pu Lalramliana Papuia chuan MAL chu pawl langsar tak angin lang lo mah se, mahni dinchhan ang taka Mizo hnam tana hma latu pawl ropui tak a ni tiin, mimal hamṭhatna atan leh lansarhna atana pawl din, pawl dinchhan piah lam thlenga inrawlh tum an awm theih laiin, MAL chu mahni huang chin ramri pela kal ngai lo pawl zahawm tak, hnam tana thil hlu leh thil tak tak buaipui ṭhin nia a hriat thu a sawi a. Mizo ṭawng, thu leh hla leh nunphung vawn him leh tihhmasawn chu MAL-in an buaipui ber nia a hriat thu sawiin, pawl anga Mizo nationalism keng nungtu pawimawh ber pakhat an nih thu a sawi.

Pu Lalramliana Papuia chuan hnam incheina, hnam lam leh nunphung humhalh leh chawi lar a pawimawh rualin, hnam thu leh hla (literature) awm sa humhalh leh tihhmasawn kawnga hma lak ṭhat chu hnam a ral loh nana thil ṭul leh ṭan lakna tur pawimawh tak a nih thu a sawi a. Chumi kawnga mi hlu leh chawimawi tlak ngei MAL te’n an chawimawi chu lawmawm a tih thu sawiin, Pu C. Chhuanvawra chu a lawmpui thu leh chhuanawm a tih thu a sawi a. Thu leh hlaa hmasawn zel turin tunlai thiamna mila inher rem thiam a ṭul thu sawiin, thuziakte digital format-a dah te, social media leh online platform te ṭawng dik leh ziak dik inzirtirna atana hman ṭangkai leh ziak mite digital skill lama intuai hriam te a pawimawh thu a sawi a. Lehkhabu hlui leh lehkhabu ṭhate vawn him mai hi Mizo literature vawn him nan a tawk tawh lo va, tunlai thiamna mila literature vawn him leh tihhmasawn kawnga hma lak thiam zel a ṭul ta hle a ni, a ti.

Award dawngtu Pu C. Chhuanvawra chuan Zosap hmasa ber pakhat, Mizo hawrawp siamtu leh thu leh hla ṭha tak tak hnutchhiahtu, Mizo ṭawng thiam leh Mizo ṭawng mawina hria, Chanchin Ṭha baka ṭha dang tam tak Mizote petu Pu Buanga hming chawi chawimawina a dawng chu hlu a tih thu sawiin, Award hlantute leh amah lawmpuitute chungah lawm thu a sawi a. Pu Buanga’n “o, au, eu, iu” ri hnua vowel lam leh dawna “v” lo ri tel ṭhin chu ziah tel a duh leh a tingaihnobeitua mi thiam ṭhenkhatin an sawi chu ropui a tih thu sawiin, amah Pu C. Chhuanvawra chuan chuti anga “v” hman tel chu hun rei tak a chin loh hnuah tunah chuan “v” hman duh zingah a tel leh tak thu a sawi a. Chhim leh hmara “g” leh “ng” lam rik dan inang lo erawh chu pawi a tih thu sawiin, a dam chhung ngeiin lam rik dan thuhmuna lam ri turin inremna awm se a duh thu a sawi.

Pu Buanga Award hlanna inkhawm hi MAL Jt Hqrs Lunglei President Pu C. Hrangdula’n a kaihruai a. MAL Jt Hqrs Lunglei Adviser Rev. RC Lalthanzama’n hunserh hmangin, Pu Buanga Award Committee Secretary Pu Rochharzela’n report a pe a. MAL Jt Hqrs Lunglei Secretary Pu TC Jonunsanga’n Pu Buanga Awardee Pu C. Chhuanvawra chanchin tlangpui sawiin, Ngaihi Chhakchhuak (ECM, MAL Jt Hqrs Lunglei), Ramhlimpuia (5th Semester, BA Mizo, Lunglei Government College) leh K. Krawsthanga (Adviser, MAL Jt Hqrs Lunglei) te’n hla an chham a. MAL Jt Hqrs Lungleia Executive Committee Member Pu ZH Ropuia’n lawm thu sawiin hun a khar.

Pu Buanga Award hlanna inkhawmah hian Pu Buanga Award dawngtu chatuan ram pan ta mi pahnih – Pi Lalsangzuali Sailo (15 May 1949 – 14 October 2006) leh Pu Lalthangfala Sailo (16 July 1933 – 1 June 2025) te sunna hun hman a ni a. Lunglei Government College-a Department of English-a Associate Professor Dr F. Lalchhanhima lehkhabu ziah, “Chhawl Chhin Loh” tih chu Pu C. Chhuanvawra’n a tlangzarh nghal bawk.

Pu Buanga Award hi kum 2000 aṭang khan Mizo thu leh hla lama thawh hlawkte chawimawina atan hlan ṭhin a ni a. A tir lamah kum 5 danah hlan ṭhin niin, kum 2015 hnu aṭang khan kum 3 danah hlan a ni ta a. Pi Lalsangzuali Sailo (2000), Pu B. Lalthangliana (2005), Prof. Laltluangliana Khiangte (2010), Pu Lalthangfala Sailo (2015), Pu RK Lalhluna (2018) leh Prof. RL Thanmawia (2022) te hnenah hlan tawh niin, kumina hlan Pu C. Chhuanvawra hi Pu Buanga Award dawngtu pasarihna a ni a. Tangkapui (trophy), thuchei (certificate) leh pawisa fai ₹10,000/- hlan niin, pawisa fai hlan tur hi khuallian, Lunglei South MLA Pu Lalramliana Papuia’n a tum a ni.

Kumina he chawimawina dawngtu Pu C. Chhuanvawra hi kum 1941 October ni 2 khan Leithumah a piang a. Pawl 7 thleng a zir hnuah chhungkaw harsatna avanga zirna chawlhsan lailawkin, kum 14 chauhva upa niin Khuangphah Primary School-ah zirtirtu hna a thawk a. Kum 1956-1964 chhung zirtir hna a thawh hnuah zir chhunzawm lehin, Champhai College aṭangin kum 1975 khan BA (Bachelor of Arts) a zo va. Kum 1977 aṭangin Govt Middle School, Bukpuiah Headmaster hna thawkin, Govt Kulikawn M/S leh Govt Boys M/S (Sikulpui)-ah te sawn niin, kum 2003 khan zirtirtu chawimawina sang “National Award to Teachers” a dawng a. Kum 2009 khan superannuation pension-in sawrkar hna a chawlhsan a ni.

Pu C. Chhuanvawra hi kum 1993 aṭangin Mizo Academy of Letters (MAL)-ah member niin, MAL leh a hnuaia committee peng pawimawh tak takah hruaitu a ni ṭhin a. Kum 16 mi chauh a nih laiin kum 1975 khan a thuziak hmasa ber, “Ka Hriat Ve Dan” tih chu a ziak a. Hla 72 phuahin, article 542 leh seminar paper 37 a ziak a. Kum 2023 thleng khan a lehkhabu ziah bu 17 chhuah a ni tawh a. Primary School aṭanga University thlengin a kutchhuak hrang hrang 26 zet zirlaibuah seng luh a ni a. India ram civil chawimawina sang Padma Shri chu Literature huangah kum 2014 khan dawngin, National Award to Teachers (2002) bakah, Mizo Writers’ Association leh Art & Culture Department buatsaih “Thu leh Hla Thiam Chawimawina” (2009) leh Vulmawi Lifetime Achievement Award (2012) te a dawng tawh bawk.