Lungleiah Book Nest Initiative hnuaia lehkhabu khawn khawmte Lungsen Aspirational Block lamah vai liam a ni

#ZONEWS Lunglei October 27, 2025: Lunglei District Deputy Commissioner (Bawrhsap) bul tuma Book Nest Initiative hnuaia Lungsen Aspirational Block-a zirlaite tana zirlaibu, thawnthu bu leh lehkhabu khawn khawmte chu vawiin khan Lungsen Block chhunga sikul hrang hranga sem darh turin Lunglei Bawrhsap Pisa tual aṭangin Bawrhsap Pi Navneet Mann leh Lunglei Sub-Headquarters YMA President Pu K. Lalfakzuala te’n an vai liam.

Lunglei DC Conference Hall-a Book Nest Initiative hnuaia lehkhabu vai liam leh lawmman semna hun buatsaihah Bawrhsap Pi Navneet Mann chuan DC Office, Education, UD&PA, NULM/Self Help Group (SHG), Young Mizo Association (YMA) Sub-Headquarters leh Branch te nen ṭang hova hlawhtling taka lehkhabu khawn khawm a ni leh thawn chhuah tura peih fel a ni chu lawmawm a tih thu sawiin, tha thawhtu zawng zawng chungah lawm thu a sawi a. Book Nest Initiative chu NITI Aayog hnuaia Aspirational Block Programme hma lakna leh Nasha Mukt Bharat Abhiyaan hnuaia ruihhlo do beihpui thlak tihhlawhtlinna pakhat a nih thu sawiin, zirna tihhmasawn kawnga mipui vantlangin ngaihtuahna leh tha an sen theihna tura chawh thawh te, faina kawngah mi tam tak tana hnawksak chang thei lehkhabu hluite a hmang ṭangkai turte tana khawn khawm leh sem darh bakah, ṭhalaite’n ram hmelma ruihhlo buaipui lova zirna leh nunphung hrisel an um zawk theih nana zirtir te chu Book Nest Initiative-in a tum a nih thu a sawi a. YMA, SHG leh mipuite thawhpuina leh ṭawiawmna an dawng ṭha chu lawmawm a tih thu a sawi.

Lunglei District Additional Deputy Commissioner Pi Zoramdini chuan hun a kaihruai a. Lunglei Sub-Headquarters YMA President Pu K. Lalfakzuala’n report pein, Lunglei District Education Officer Pu Micky R. Lalenkawla’n thu a sawi bawk a. Veng chhunga in awm zat aṭanga chhuta lehkhabu khawn chhuak ṭha zual veng 5-a YMA Branch leh SHG te hnenah lawmman hlan niin, a bak YMA branch leh SHG tel zawng zawng chu lawmman pek an ni bawk.

Book Nest Initiative hnuaiah hian Lunglei Sub-Headquarters YMA hnuaia Lunglei khawpui chhung YMA branch 19 te’n lehkhabu 11,034 khawn chhuakin, Lungsena YMA branch 3 aṭangin lehkhabu 22, UD&PA aṭangin lehkhabu 312 leh AstroScape neitupa, Pu Aryan Mishra hnen aṭangin lehkhabu 106 dawn a ni bawk a; a zavaiin lehkhabu 11,474 khawn khawm a ni.

Lunglei Bazarveng, Sethlun, Rahsiveng, Lunglawn leh College Veng te chu a indawt danin lehkhabu khawn chhuak ṭha pakhatna aṭanga pangana an ni a. He’ng venga Branch YMA-te leh SHG-te chu lawmman pawisa fai leh thuziak hlan an ni a. Veng dang 14-a YMA Branch-te leh SHG dang 4 te pawh lawm thu sawina pawisa fai leh thuziak hlan an ni bawk.

Lehkhabu thawn chhuahte hi Lungsen Block-a sikul hrang hrang 61 (primary school 27, middle school 27, comprehensive school 3, high school 3 leh higher secondary school 1)-ah te sem darh a ni dawn a. He’ng sikulahte hian lehkhabu chhuar (bookshelf) pawh siam vek niin, zirlaite’n he’ng lehkhabute hi ṭangkai taka an hman theih nan ruahmanna siam a ni.