Chief Secretary Pu Khilli Ram Meena chuan Lunglei a tlawh

#ZONEWS Lunglei December 17, 2025: Vawiin khan Mizoram Chief Secretary Pu Khilli Ram Meena, IAS chuan Lunglei tlawhin, sawrkar pisa hotu (head of office)-te inkawm hona hun a hmanpui bakah, Lungleia sawrkar hma lakna hmunhma pawimawh ṭhenkhat a tlawh.

Chief Secretary hi Lunglei District Bawrhsap Pi Navneet Mann hovin sawrkar official-te’n Lunglei Helipad-ah an lo dawngsawng a. Lungleia sawrkar pisa hotute nen DC Conference Hall-ah inkawm hona hun an hmang.

He hunah hian Chief Secretary Pu Khilli Ram Meena chuan sawrkar laipui duh dan anga ram mipuite mamawh ngaihtuahna leh hmasawnna hna thawh hrang hrangah tih tur hlen chhuah (saturate) a nih theih nan ruahmanna kimchang leh felfai tak a awm a ṭul thu sawiin, department hrang hrangte chu an hna thawhna turah leh mipui rawng an bawlna kawngah ruahmanna fel tak siam turin a chah a. DAJGUA hnuaia scheme 17 kal tlanga hmasawnna tluantling a awm theih nana hma laknaah pawh mamawh bulpui hmasa pahnih – inkal pawhna kawngpui ṭha leh inbiak pawhna internet ṭha a awm theih nana ruahmanna siam a, hma la turin District thuneitute chu a chah a. Khaw tin leh mi tin thleng phak ruahmanna leh hmasawnna a awm a pawimawh thu sawiin, hriselna, zirna leh nun khaw chhuahna atana khua leh tuite mamawh hrang hrang a nih dan tur tak leh a hun taka pe thei turin department hrang hrang chu theih tawp chhuah turin a chah a. Ruahmanna fel tak a awm chuan sawrkar hma lakna hrang hrangah hmasawnna tluantling leh hlawhtling zawk a awm thei ngei ang, a ti.

Bawrhsap Pi Navneet Mann chuan Chief Secretary lawmna thu sawiin, Lunglei District dinhmun tlangpui leh District chhunga sawrkar hma lakna langsar zual report a pe a. June 15 – July 30, 2025 chhunga DAJGUA Awareness & Benefit Saturation Campaign kalpuiah Lunglei District chhunga khaw thlan bik 48-ah campaign 180 chuang buatsaih a nih thu leh Aadi Karmayogi Abhiyan hnuaiah khaw thlan bik 48-ah khawtlang hmasawnna tur ruahmanna “Village Action Plan” duan fel tawh a nih thu a sawi.

He hunah hian Urban Development & Poverty Alleviation, Land Revenue & Settlement, Health & Family Welfare, Public Health Engineering, Commerce & Industries, Power & Electricity, School Education leh Sanik Welfare & Resettlement Department hotute’n presentation pein, an department hma lakna hrang hrang dinhmun bakah, harsatna leh mamawh an neihte an tar lang a. Lunglei District hmasawnna tura sawrkar hma lakna hrang hrangte sawi ho niin, harsatna chin fel dan tur leh chak zawka hma lak dan tur te sawi ho a ni bawk.

Chief Secretary hian Pukpuia AYUSH Health & Wellness Centre leh Anganwadi Centre-I te tlawhin, an dinhmun a enfiah a. AHWC-ah hian thawktute’n damdawi in dinhmun leh damlo an enkawl dan te lo hrilhin, harsatna leh mamawh an neihte an lo thlen a. AWC-ah hian thawktute leh naupangte nen inkawm hona hun hmangin, ICDS-a thawktute chuan nu leh naupang hriselna leh chaw ṭha pekna kawnga an hna thawh dan leh harsatna an neihte a hnenah an lo thlen a. Thawktute leh official-te nen Health Department leh ICDS hnuaia hmasawnna tur ruahmanna leh rawtna hrang hrang an sawi ho nghal bawk.

Chief Secretary hian Civil Hospital Lunglei tlawhin, NCD Clinic-a mipuite’n rang taka khawl hmanga mahni hriselna dinhmun an en theihna Health ATM chu a enfiah a. Thawktute’n lo dawngsawngin, Health ATM nihphung leh hman dan an lo hrilhfiah bakah, mipuiin an chhawr ṭangkai dan te an hrilh a. Khaihlak lo leh ṭangkai zawka Health ATM hi hman a nih theih nan hmanrua (test kit) mamawh hrang hrang ngaihtuah belh dan tur te an sawi ho a ni.

Chief Secretary hian Mizoram zirna ina vansang chanchin zirna hmun bik – Cosmic Class (Astronomy Lab) hmasa ber, Lunglei District Bawrhsap hma laknaa Government Leitlangpui High School-a bun chu tlawhin, a enfiah bawk a. Thawktute’n Astronomy Lab nihphung leh a hman dan te, Lunglei khawpui chhunga zirlaite’n vansang chanchin hriatna atan an chhawr ṭangkai thu te an lo hrilh a. Chief Secretary chuan Astronomy Lab bunna tura Lunglei Bawrhsap hma lakna chu fakawm a tih thu sawiin, zirlaite’n ṭangkai zawka an hman a beisei thu leh district dang entawn atan pawh ṭha a tih thu a sawi.

Chief Secretary hian Lunglei District Museum pawh tlawhin, thawktute’n Museum an lo fanpui bakah, Museum dinhmun leh a tihchangtlunna tura mamawh an neih hrang hrangte an lo thlen a. Chief Secretary hian a hmunhma tlawh hrang hranga hmasawnna tur leh hma lak ngaihna te chu chhinchhiahin, Bawrhsap leh thawktute nen a ṭul anga bawhzui dan tur an sawi ho nghal zel a ni.

Attachment