HEALTH MINISTER PI LALRINPUII’N ZMC&H HMASAWNNA HNATHAWH A HMUNAH A ENDIK – KHUM 46 HAWN THAR NGHAL A NI

Aizawl| Vawkhniahzawn thla ni 2, 2025: Vawiin khan Health Minister Pi Lalrinpuii chuan Zoram Medical College & Hospital (ZMC&H), Falkawn tih changtlunna tur atana hmalakna hrang hrangte a hmunah kalin a endik a, Adviser to CM Pu TBC Lalvenchhunga bakah Dr. Lalthlengliani, Principal Director, Directorate of Hospital & Medical Education leh Dr. Ngurchamliana, Director, DHME ten an tawiawm.

Pi Rinpuii chuan ZMC&H hnuaia thawktu hrang hrangte chu tlawhkualin an harsatna leh mamawh an sawite a ngaihthlak sak a, sawkar chuan thawktute leh mipuite tan theih tawpa hma a lak zel tur thu a sawi. Vawiina Health Minister-in Damdawi In a tlawhna leh tun hnaia Mizoram Universal Health Care Scheme kalpui a nih hnua ZMC&H tih changtlun nana Health Department hmalakna langzar zualte chu:

• Pi Rinpuii chuan Medicine Ward, khum sawmhnih paruk (26) awmna chu naktuk a nih loh pawhin a hma thei ang bera hman hman tan nghal ni se a ti.

• Gynaecology Ward, khum sawm (10) awmna pawh hman tan nghal a nih tur thu a sawi bawk.

• Cabin sawm (10) awm thinah MUHCS kalpui a nih hnuin Cabin sawm (10) hawn belh a lo ni tawh a, vawiin vek khan cabin sawm (10) dang hawn belh leh niin Cabin sawm (10) dang leh pawh hawn leh thuai tura ruahman nghal a ni.

• Orthopaedic Ward khum sawmhnih paruk (26) awm thinah khum sawm thum (30) dah belh a ni.

• Nausen pianghlim enkawlna, Neonatal Intensive Care Unit (NICU) pahnih (2) hawn a ni bawk a, a hmaa lo awm tawh sa nen tun dinhmunah NICU hi pariat (8) a awm mek a ni.

• Pediatric Intensive Care Unit (PICU) tuna awm mek pathum (3) bakah pakhat dang dah belh tura hmalak mek a ni bawk.

• Integrated Care Unit (ICU) awm tawh sa sawmpathum (13) bakah sawm pathum (13) dang hawn thar a ni dawn a, khawl remkhawm hna buaipui mek a ni.

• Operation Theatre panga (5) – Gynaecology (2), Cardiology (1), Neurology (1), General (1) hawn thar tura hmalak mek a ni a, tun dinhmunah OT hi panga (5) hman theihin a awm mek a ni.

• Cardiology Ward thar, khum paruk (6) awmna chu hawn theih tura chak taka hmalak mek a ni bawk.

• Thawktu indaih lohna phuhru turin MUHCS Multitask Worker mi sawmhnih (20) leh Casual Nurse sawmruk pali (64) lak thar an ni tawh bawk a, heng bakah hian Junior Resident (JR) lakna tur buaipui mek a ni bawk. Dr Zothansanga Zadeng, MCH Neurosurgery (Super Specialist) chuan a zirlai zir zoin, ZMC&H a zawm leh tawh a, mipui tan inentir a theih leh tawh bawk.

Vawiina ZMC&H a tlawhnaah hian Minister Pi Lalrinpuii chuan thawktute inpekna chu lawmawm a tih thu sawiin hmalakna kal mekte pawh zawh fel thuai a beisei thu a sawi bawk a ni.