KVK Khawzawl-in Nihawi chin leh a hriak sawr an enchhin chu a hlawhtling hle

KVK Khawzawl chuan hriaka intodelh a nih theihna tura Nihawi (sunflower) chin an enchhina chu a hlawhtling hle a, huam zau zawka hmalak zel an tum thu Dr Malsawmkimi, Sr Scientist, KVK Khawzawl chuan a sawi.
Dr Malswmkimi, Sr Scientist KVK Khaw-zawl chuan Khawzawl Times zawhna chhanga a sawi danin, KVK Khawzawl chuan hrik lama intodelhna kawnga hmalakna hmasa atan leh a enchhina atan Biate leh Rabung khua chu Mission Oilseed Village atan an thlang a, chhungkaw thlan chhuah bik pangte chu Nihawi (Variety KBSH 44 UAS) chin tir niin hlawhtling taka thar a ni.
Biate khua Hmunte zaua kuthnathawktu mi pali intelkhawmte chuan leilet tin 4 hmunah kumin January thla khan ching tanin June thla khan a hriak sawr theih tura seng a ni a, Hmunte zaua lo neitu zinga pakhat Pu R.Lalrualliana chuan tin 150 zet a thar a, Nihawi chi tin khat (kg 7) ah a hriak litre 4 vel zel chuak theia ngaih a ni a, Nihawi hi cold press extractor hmanga sawr a ni a, hot press extractor hmanga sawr nise chuan hei ai hian a hriak pawh chhuak hnem theih beisei a ni a, a thianghlimin a rim pawh a tui a, a hralhna lamah pawh buaina an tawk lo niin Dr Malsawmkimi chuan a sawi bawk a ni.
Dr.Malsawmkimi chuan Nihawi chingtu kuthnathawktute hi Food Safety and Standards Authority of India (FSSAI) buaipui sak mek an nih thu a sawi bakah, kum thar lamah zau zawka hmalak chhoh zel an tum tih a sawi bawk a ni.