Aizawl DC-in Sihhmui Bazar bula National Highway No. 44(A)-a road accident thleng thin tihziaawm nan hma a la

#ZONEWS Aizawl December 19, 2025 : Deputy Commissioner, Aizawl District chuan Sihhmui Village Council leh NGO-te’n Sihhmui Bazar bula National Highway No. 44(A)-a road accident hrang hrang thleng thin tihziaawm nan leh he’ng chetsual palhna laka mipuite kan him zawk nan hma la tura an rawn ngen angin theihtawp a chhuah a. Helai hmuna lirthei khalh chak lutuk leh fimkhur loh avang hian Sihhmui VC-te’n an report danin nunna chan mi paruk (6) leh hliam tuar mi engemawzat an lo awm tawh nia hriat a ni.

He’ng chetsualna thleng thinte laka inven nan helai hmuna dah tur hian steel barricade pali (4) ft 6 a sang, hun sawn theih, chu Deputy Commissioner, Aizawl District chuan Sihhmui Village Council leh YMA hruaitute kutah vawiin ni 19.12.2025 hian a hlan a. He’ng barricade-te hi Sihhmui Village Council, YMA leh OC, Sairang Police Station te tangkawpin an enkawl tur a ni ang. Tin, lirthei tlan chak lutuk laka inven nana dah tura tih a nih angin National Highway-a motor tlan pangngai tikhaihlak zawnga dah loh tur a ni ang. He’ng barricade dahte hi mipui kan him zawkna tur a ni tih hria a, a enkawltute leh viltu Village Council, YMA leh Police te tan harsatna siam lova thawhpui theuh turin Deputy Commissioner, Aizawl District chuan mipui te a ngen tak meuh meuh a ni. 

Tin, helai kawng hi National Highway a nih avangin Ministry of Road Transport and Highways (MoRTH) thuchhuak angin Speedbreaker dah a rem lo a, MoRTH-in National Highway atana a phal chin rumble strip dah turin PWD (Highways Division)-te nen hma lak mek zel a ni a. He hmalakna hi tihhlawhtlin a nih hma chuan barricade hi hman lailawk tur a ni ang.