ASF chungchanga Siaha District Magistrate thuchhuah

#ZONEWS Siaha August 20, 2025: District AH & Vety. Officer, Siaha District, Siaha hnen atanga hriattirna kan hmuh angin tun dinhmunah Siaha Khawpui chhung veng hrang hrangah Vawk thi engemawzat a awm a, heng vawkte hi Diseases Investigation Laboratory, Aizawl leh NERDDL, Guwahati, Assam-ah te African Swine Fever (ASF) avanga thi an ni tih finfiah (confirm) a ni tawh a, Siaha Khawpui chu infected Area-a puan a lo nita a ni.

Siaha Khawpui chhunga Vawk thi te hi tun dinhmunah zia awmlam pan mahse, a dam/hri kailo tamtak an la awm avangin fimkhur a ngai hle a, hrileng thawhhnihna a thlen loh nan leh Siaha District huamchhunga khaw hrang hranga kan Vawkte hri laka an lo him theih nan leh hrileng mek hi dan chah a nih theih nan khuahkhirhna thupek ‘Order’ chhuah chhunzawm a lo tul ta a ni.

Chuvangin, kei, VL HRUAIZELA KHIANGTE, DISTRICT MAGISTRATE, SIAHA DISTRICT, hian Section 163 of Bharatiya Nagarik Suraksha Sanhita, 2023-in thuneihna min pek angin, hetiang hian thupek ka chhuah e.

1. Infected Area huam chhungah Vawk hrisel tha talh duh an awm chuan Clinical Examination tih sak a, Rapid Test Kit hmanga test negative te chu talh phalsak an ni a. Test Kit man hi talh tur bikah chuan a neituten an tum ang. Vawk talh tur hi a hrisel ngei a ni tih hriatpuina Soundness Certificate, AH & Vety. Office, Govt. of Mizoram, Siaha District hnen atangin an nei ngei tur a ni. Tin, Vawk talhna hnuhma/hmunhma reng reng Disinfectants, Chinai, Bleaching etc. hmangin fai tak leh thianghlim takin thenfai thin tur a ni.

2. Infected Area niloah chuan Vawk hrisel talh duh an awm chuan Rapid Test Kit a Negative te Soundness Certificate nei te khawtlang hruaitute hriatpuina in an talh thei ang.

3. Siaha District huamchhungah Ram dang, State dang leh District dang atangin Vawk, Vawksa leh Vawksa atanga eitur siam chi reng reng lakluh khap tlat a ni.

4. Siaha District huamchhunga African Swine Fever (ASF) hri lenna hmun (Infected Area) atangin Vawk, Vawksa leh Vawksa atanga eitur siam chi reng reng lakchhuah/lakluh khap tlat a ni.

5. Siaha District huamchhung, khua leh khua inkarah Vawk, Vawksa leh Vawksa atanga eitur siam chi reng reng inlak pawh tawn khap tlat a ni.

6. Vawk damlo reng reng talh khap tlat a ni a, Vawk damlo chu dah hran vat tur a ni.

7. Vawk damlo nei ten a ranglamin AH & Vety. Hospital, Govt. of Mizoram, Siaha District, Siaha emaw mahni khua/veng VFA/VC/Task Force te hnenah hriattir vat tur a ni.

8. Vawk thi leh suat (culled) tur nei te chuan AH & Vety Department ah in report ngei ngei tur ani. Vawk thi leh suat te reng reng chu paih mai lovin Disinfectants, Chinai, Bleaching etc. nen thuk taka phum tur a ni. Mahni compound a phumna tur nei te chuan mahni compound-ah phum mai ni se. Phumna tur neilo chuan khawtlang hruaitu te’n phumna tur a a siam ah phum tur a ni.

Hemi dan bawhchhia chu Section 223 of Bharatiya Nyaya Sanhita, 2023 hmanga na taka hrem an ni ang.

He thupek hian chhuah a nih atanga thla nih (2) chhung a huam ang.

He thupek hi nemnghetin vawiin ni 14th August, 2025 hian hming ka ziah hnan e.

Sd/-
VL HRUAIZELA KHIANGTE
DISTRICT MAGISTRATE
SIAHA DISTRICT, SIAHA