Champhai District Monitoring Committee for Bana Kaih Scheme an thu khawm

#ZONEWS Champhai July 29, 2025: Vawiin khan DC Conference Hall, Keifangtlangah District Monitoring Committee for Bana Kaih Scheme chu an thukhawm a, Champhai Bawrhsap leh Chairman ni bawk Pu Mohammad Aaquib chuan a kaihruai a ni.

He meeting-ah hian Champhai District chhunga Chief Minister’s Special Package hnuaia thawhpui tura thlan Progress Partner te thawhpui dan tur rel a ni a, department hotute mawhphurhna te, Progess Partner an puih dan tur te, an thlithlai dan te leh enkawl dan tur te sawi ho a ni. Progress partner te chu an hamthatna dawng turin training leh programme hrang hrang kim taka tel tur niin department hotute an kal ngei a ni tih finfiah tura hriattir an ni a, lehkha thehluh ngai te leh bank account enkawl chungchangah te pawh an kaihruai zel tur a ni tih sawi lan a ni bawk. Chairman Pu Mohammad Aaquib chuan he scheme hi Mizoram scheme chhuanvawr leh langsar ber (flagship scheme) a nihna angin hotute ngai pawimawha tan la turin a sawm a, mahni department hnuaia thawhpui tura thlante kaihruai tha turin a fuih bawk a ni.

CM Special Package hnuaiah hian Champhai District atangin mi 96 Progress Partner atan thlanchhuah an ni a, hetiangin – Agriculture Department hnuaiah 9, AH & Vety. Department hnuaiah 26, Commerce & Industry Department hnuaiah 28, Fisheries Department hnuaiah 28, LR,S&WC Department hnuaiah 2, Sericulture Department hnuaiah 2, UD & PA hnuaiah 1. Heng thlan chhuah te tan hian July ni 31, 2025-ah I&PR Auditorium-ah Orientation Training buatsaih a ni dawn a, tello chuan hamthatna an dawng thei dawn lo a ni.

District Monitoring Committee for Bana Kaih Scheme hi Planning & Programme Implementation hnuaia Mizoram State Policy Coordination Committee thurel anga din a ni a, Chairman hi Bawrhsap niin Member Secretary hi SDO (Sadar) a ni. Department hrang hrang hotute leh aiawhte member-a ruat an ni bawk.