Dampa Bialtu MLA Pu Lalrintluanga Sailo ruangin Mizoram a thleng; Zanin tlaivar puiin naktukah vui a ni ang.

#ZONEWS July 22, 2025: Dampa bialtu MLA Pu Lalrintluanga Sailo ruang chu vawiin khan New Delhi atangin Aizawl thlenpui a ni a. Zanin tlaivarpui a ni anga, naktukah vui liam a ni ang.

Dampa bialtu MLA Pu Lalrintluanga Sailo ruang chu vawiin khan Mizoram phurh thlen a ni a, Lengpui Airport ah mi thahnem takin an lo hmuak a, a ruang hi zaninah lumen a ni ang.

Puan tawh angin Dampa bialtu MLA Pu Lalrintluanga Sailo hi nizan khan MAX Super Speciality Hospital, Delhi-ah nizan khan kum 65 mi niin a thi a, AIIMS Hospital ah a ruang chhiat lohna atana sawngbawl tura phurh phei niin Max Hospital ah tawngtaina nen thlah a, a ruang hi vawiin khan Mizoram phurh thlen niin zanin lumen hnuah naktuk hian Luangmual Presbyterian Kohhran Centenary Hall ah vui a ni ang.

Pu Lalrintluanga Sailo ruang hi Delhi cham mek Rajya Sabha MP Pu K. Vanlalvena, Lok Sabha MP Pu Richard Vanlalhmangaiha leh Mizoram sawrkara Assembly Speaker Pu Lalbiakzama bakah ten Delhi atangin an thlah a, Home Minister Pu K. Sapdanga’n a ruang hi a zui chho a ni.

Pu Lalrintluanga Sailo hi a khawsik nasat avangin June ni 29 khan Delhi panpui a ni a, Max Hospital-ah hian ni khat ward-a a awm hnuah ICU-ah dahluh a ni a, hun rei tak a damloh hnuah nizan dar 9 khan a thi a ni.

Kum 1960 a piang Pu Lalrintluanga Sailo hi kum 16 mi a nihin Mizo National Front underground movement a zawm a, kum 1986-a Mizo Peace Accord ziah anih hnu khan Pu Laldenga personal driver hna a thawk leh a, MNF ticket in kum 2018 leh kum 2023 khan Dampa bialah thlan tlin a ni.

Pu Lalrintluanga Sailo hi Luangmual vengah chengin a nupui Pi Lalbiakthuami leh a fate 5 a kalsan a, Luangmual Village Council ah kum 12 chhung a zawnin vawi 4 thlan tlin alo ni tawh a, Mizoram Football Association ah term hnih chhung Executive member a ni bawk.