DARLAK LEH TUIDAM INKAR KAWNG SIAMNAN CHENG NUAI 20 A TLEM LUTUK. – RRR, Hachhek MLA.

#ZONEWS July 26, 2025: Ni 2 chhung, July ni 25 leh 26, 2025a Hachhek bial chhunga kawngpui chhe laite endika a hmuna kal Hachhek Bialtu MLA Pu Robert Romawia Royte chuan Mizoram leh Tripura inkalpawhna kawng pawimawh Darlak to Tuidam Road chhe em em Sorkarin a enkawl dan chuan ‘tah a tichhuak hle’ a ti a.”Ni 16 & 17, June 2025 a a hmuna ka endik lai aiin nasa takin alo chhe zual tawh a, chu chu Sawrkarin siamtha tura hma a lak tawk loh vang a ni” MLA Pu Roberta chuan a ti.

Tunhnaia PWD Minister zahawm takin Darlak to Tuidam road a tlawh chu lawmawm a tih thusawiin a siamthat nana cheng nuai 20 chauh a puang erawh chu khawthlang mipuite mak tih a ni tiin cheng nuai 500 tal sanction vat turin sawrkar a phut tih a sawi. Hachhek MLA chuan he kawng hi Mizoram PWD ta leh enkawl lai a nih avangin Mizoram sawrkar hian mawhphurhna laa rang taka siamtha turin kan phut a ni a ti a, hetiang kawngpui pawimawha harsatna khirh tak a thlen mek chhan chu Mizoram sawrkarin a ngaihsak loh vang leh repair tura hma a lak tawk loh vang mai a ni a ti.

   Hachhek bialtu MLA leh MNF Thalai President ni bawk chuan Hachhek bial kal tlanga Tripura kalna kawng pawimawh dang  Barabi to Zamuang kawng PMGSY sum hmanga siam mek ah Contractor a thawh muan lutuk avangin PWD in “show cause notice” an pe hial tih sawiin ZPM Sawrkar hnuaia State Monitoring Committee te hian Bairabi to Zamuang kawng siam muan chhan hi monitor in zawng chhuak vat se a duh tih a sawi. Hachhek MLA hi hmun 5 ah kawngchhiaa motor tangin a dang a ni.