Directorate of I&PR hnuaia Ministerial Staff-te tan Computer Training Buatsaih a ni.

#ZONEWS Aizawl July 28, 2025 Thawhtanni: Vawiin khan, IPR&PS Secretary Pi Betsy Zothanpari Sailo chuan I&PR Conference Hall, Lianchhiari Runah ni nga chhung awh tur, Directorate of I&PR leh Sunset Computer Centre, Kulikawn tangkawpin DIPR hnuaia ministerial staff-te tana an buatsaih, ‘Training on basic Computer Knowledge’ chu khuallian niin a hawng.

Hawnna hunah hian khuallian IPR&PS Secretary Pi Betsy Zothanpari Sailo chuan thusawiin, DIPR-a thawktute tana training pawimawh tak buatsaih a ni chu lawmawm a tih thu a sawi a. Khawvel thiamna sang zelah, computer chu hnathawhna ber a lo nih tak avang leh sawrkar pawhin awlsam leh chak zawka mipuite rawng a bawl theihna turin e-office chu a ngai pawimawh hle tih sawiin, Secretariat-level ah e-office kalpui a ni tawh a, Directorate leh District-levelah kalpui turin ruahmanna a awm mek a, chumi atana inpuahchahna tura training buatsaih chu thil tangkai tak a ni tih a tarlang a. Training chu hlawkpui tum theuh turin kalkhawmte chu a chah nghal bawk a ni.

Ni nga chhung awh tur DIPR hnuaia ministerial staff-te puala Computer trainingah hian Directorate leh DIPRO office hrang hrang atangin mi 26 an tel a, vawiin atanga tun kar zirtawpni thlengin nitin darkar 3 an training ang.  An training na hmun tur hi Sunset Computer Centre Kulikawn leh Mission Vengthlangah a ni ang a, training hi practical-a kalpui tur a ni a, trainee te hian computer inhman tawm lovin anmahni pualin hman tur an nei theuh ang a, zirtirtuten uluk takin an vil dawn a ni.

Vawiin training hawnna inkhawm hi DIPR Director Pu C. Lalnunkima chuan a kaihruai a. Deputy Director Pu Andrew H. Lalremruata hnen atangin training puala inpuachahnate report ngaihthlak niin, Sunset Computer Centre Director Pi Lalrengpuii’n an inbuatsaih dante leh zirtirna kalpui an tum dan a sawifiah bawk a ni.