DR. LORRAIN LALPEKLIANA CHINZAH ADVISER TO CHIEF MINISTER HOVIN FREE AMBULANCE LEH FREE MEDICAL CENTER HAWNNA NEI

#ZONEWS Lawngtlai October 3, 2025 : Vawiin khan Free Ambulance leh Free Medical Center hawnna inkhawm chu DC Conference Hall- ah neih a ni a. Dr. Lorrain Lalpekliana Chinzah, Adviser to Chief Minister ( H&FW, A&FW) leh Lawngtlai East bialtu MLA nibawk chuan hawnna neiin, Pu Donny Lalruatsanga, Lawngtlai Bawrhsap chuan hun a kaihruai.

Dr. Lorrain Lalpekliana Chinzah chuan kalkhawmte hnena lawmthu sawina a nei hmasa a. MLA chuan politics khelh nan a hmang lo a, a mamawh tak tak ten tangkai taka an chhawr theih tura Lawngtlai mipuite tan a hawn thu a sawi a. Free Ambulance leh Free Medical Center – hi nikum lam khan Mamit District – ah kalpui a nih tawh thu tarlangin, kumin hian Serchhip leh Lawngtlai District- ah kalpui a ni dawn a ti. Adviser to Chief Minister chuan Lawngtlaiah tha taka kalpui a nih dawn avangin, mipuite an chhawr tangkai dawn hle a, mipuite tan malsawmna a ni ang a ti. Adviser to Chief Minister chuan ‘Free Ambulance leh Free Medical Center Project’ ah hian a duh apiang tan a hman theih a nih rualin, VC, NGO leh Health lam a thawk ten an hriatpuina a ngai dawn tih a tarlang a. Lawngtlai District- tan hmasawnna rahbi thar a nih dawn thu sawiin,tangkai tak a hmang turin Lawngtlai District mipuite a sawm a. Dr. Lorrain Lalpekliana Chinzah chuan Free Ambulance leh Free Medical Center – kalpui a nih theih chhan ber ‘ Friends of People ‘ te chungah lawmthu a sawi nghal bawk.

Dr. David Thawmthang chuan report pekna neiin, Free Ambulance leh Free Medical Center – kalpui a nih theih chhan bulpui ber chu Dr. Lorrain Lalpekliana Chinzah hmalakna a ni, a ti a . Free Ambulance hmang tur ten mumal taka an dil a ngai dawn a, hemi atan hian dilna form siam a nih tur thu a sawi a. Ambulance kal theih lohna hmunah chuan tuialhthei ( Oil ) an tum sak thin dawn a ti. Free Ambulance leh Free Medical Center – hi District Hospital Lawngtlaiah an inbun dawn tih sawiin, Doctor – 1 leh Nurse- 3 ten a vil reng dawn a, a tul dan a zirin damdawiin pawh an puih dawn tih a tarlang a ni. 

Pu Donny Lalruatsanga, Lawngtlai Bawrhsap chuan Lawngtlaia ‘Free Ambulance leh Free Medical Center’ kalpui a ni tur chu lawmawm a tih thu a sawi a. Hriselna lamah hmasawnna thar a thlen ngei a beisei tih tarlangin, thingtlang lam ten an chhawr tangkai dawn hle a ni, a ti. Pu PC Lalchunglura, Superintendent of Police Lawngtlai pawhin thu sawina neiin Lawngtlai mipuite tan malsawmna a ni, a ti a. Tangkai tak hmang turin duhsakna a hlan nghal bawk.

Vawiin hun hmannah hian Lawngtlai SP, SDO(S), Deputy CMO, MJA Lawngtlai leh Free Ambulance leh Free Medical Center – a thawkte an tel thei a. Pu Donny Lalruatsanga chuan lawmthu sawina neiin hun a khar.

Free Ambulance leh Free Medical Center – hi October Ni 15 atangin hman tan theih a ni dawn a ni.