IPRP&S Minister-in Department hnuaia thawktute kawm

#ZONEWS Aizawl October 27, 2025: Vawiin khan IPRP&S Department changtu Minister Pu B. Lalchhanzova chuan I&PR Conference Hall, Lianchhiari Rûn-ah, Department hnuaia thawktute kawmin, Department dinhmun, hmalakna leh hmachhawpte a sawipui.

Meeting-ah hian IPRP&S Minister Pu B. Lalchhanzova chuan thu sawiin, IPRP&S Department chu mipui nena inngheng reng leh sawrkar hlimthla tilangtu pawimawh tak a nih thu sawiin, hmasawn zel nana pawimawhte thawktute nena inpawhtlang taka sawihona buatsaih chuan rah tha a chhuah ngei a beisei thu a sawi a. Department-a thawktute chu ram leh hnam hmangaihna leh mipuite tana rawngbawlna rilru pua mahni zawnah theuh theihtawp chhuaha thawk tura chahin, Mizoram chuan anmahni lo chu midang a nei chuang lo tih inhre reng turin a fuih a. Sawrkar chuan langtlang leh mawh la ngam, mipuite tluk luhna tlak inrelbawlna leh hmasawnna chhawp chhuahsak a duh tih tarlangin, lungrual taka mipuite rawngbawlpui turin kalkhawmte chu a chah nghal bawk a ni.

Vawiin meeting hi Pi Betsy Zothanpari Sailo, Secretary, IPRP&S Department chuan kaihruaiin, Information & Public Relations  aiawhin Pi K. Vanlalsangi, Director leh Pu Malsawmsanga, Jt. Director te’n I&PR dinhmun tlangpui leh hmalakna tura ruahmanna awmte an sawifiah a. Printing & Stationary aiawhin Pu Benjamin Lalzama, Controller leh Er. Vanlalmuanchhana, Manager, Principal cum Project Manager te’n P&S hmalakna leh hmachhawpte an sawifiah a. Hemi hnu hian Department kaihhnawiha zawhna leh chhanna hun hman niin, programme zawhah Minister hian Department hmunhmate fangin hnathawh dante a enfiah nghal bawk a ni.