Kawng chhia vanga harsatna chinfel dan ngaihtuahin ZPM Legislature Party inhmukhawm – Minister leh MLA pahnihin nitin an vil tawh dawn

#ZONEWS Aizawl July 28, 2025 Thawhtanni: ZPM Legislature Party chuan inrinnni zan khan Kawnpui leh Sairang inkar NH-6 kawngpui chhia leh chumi nghawnga lirthei leh driver tangkhangte harsatna sutkian dan tur ngaihtuahin informal meeting hmanhmawh an nei.

PWD Minister Pu Vanlalhlana kaihhruai meeting-ah hian Minister leh MLA 16 kalin Mizoram châk lakna kawngpui siam hna a kal chak thei lo leh chumi avanga mipui tawrhna thleng mek chu pawi an ti a, hna hmanhmawhthlak thawh dan turte relin mipui harsatna a rang thei anga sut kian dan an rel.

ZPM Legislature Party ṭhukhawm chuan, lirthei tangkhangte a rang thei ang bera an chhuah theihna turin ruahmanna siam chhunzawm zel ni se, Home Minister-in a tih tur ṭulte lo ngaihtuahin Police lam pawh ṭhahnem zawk tirh luh ni se, an ti.

Lirthei tangkhang enkawltute hian ei leh in tur an tlachham tawh a, a rang thei ang bera ngaihven nghal tura tih niin DC, Kolasib kaihhruaia tangkhangte ei leh in buaipuina atan  Rs.3,00,000/- pek chhuah chu Pathianni (27th July) hian sem ṭan a ni ang tiin an rel a, Kolasib bialtu MLA Deputy Speaker Pu Lalfamkima’n a vil zui ang. Sairang lam hnaiha tangkhangte ei leh in tur pek chungchangah Dr Lorrain Lalpekliana Chinzah leh Pu Jeje Lalpekhlua-ten an enpui ang tiin an rel a, vawiin hian ei leh in hi sem ṭan nghal a ni.

Kawng siam ṭhatna atan lung (boulder) mamawhna a sang hle a, Mizoram pumah a lakkhawm theih dan kawng dap ni se, tiin an rel a. Kawng chhiatna hmunah hian PWD officials thuneitu sang chinin awm chilh se an ti a, Silchar lam atang lung chang tha lakluh nise an ti bawk. 

Tukin (Pathianni) dar 8:00 khan PWD Minister inah PWD hotu liante koh khawm an ni a, an hnathawh dan tura Mizoram sorkar duh dante hrilhfiah an ni; he hunah hian Minister pathum – Dr Vanlalthlana, Pu F. Rodingliana, Prof Lalnilawma bakah Adviser to Chief Minister pathum – Pu Lalmuanpuia Punte, Pu TBC Lalvenchhunga leh Er H Ginzalala-ten PWD Minister an ṭawiawm.

Kar kalta zirtawpni zan leh Inrinni nileng leh zanah Supply Minister Pu B Lalchhanzova’n a hmunah a kal chilh a, mipui nitin mamawhte a rang thei ang bera phurh luh a nih theih dan tur a enpui bawk a ni.

He kawngpui changtu NHIDCL-te dawr chhunzawm reng niin chak zawka hna an thawh theih dan turah ruahmanna siampui zel an ni a; Mizoram kawngpui pawimawh a nih avangin Chief Minister Pu Lalduhoma duh danin sorkar sum awm ang angin harsatna awm mek chinfel dan tur  ngaihtuah chhunzawm zel a ni ang.

Tukin meeting chuan kawngpui siam hi nitin Minister leh MLA pahnih talin tlawh ziah turin an rel a, NHIDCL leh PWD-te hnathawh hi a hmunah endikin an vil ṭhin ang tiin an rel a ni.

Mizoram châk lakna kawngpui hi NHIDCL-in rintlak leh ṭha taka an siam hi ZPM Legislature party duh dan a nih thu tarlan niin, mipui tana harsatna lian tham a thlen tawh lohna turin PWD pawhin a ṭul ṭulah an pui ṭhin bawk ang tiin an rel bawk.

ZPM Legislature Party hian he kawngpui pawimawh avanga harsatna a taka vil turin Crisis Management Committee an din nghal a, kawng siamna atan hian Minister Pu F. Rodingliana’n a truck 3 leh vibratory roller a thawh a, Adviser to CM Er. H. Ginzalala’n JCB 3 thawh bawkin, Assemby Speaker Pu Lalbiakzama’n veivahna tur POL a thawh bawk a ni.

Pu Jeje Lalpekhlua, MLA leh Dr. Lorrain Lalpekliana Chinzah, Adviser to CM ten driver tangkhangte eitur pe in vawiin khan an thawkchhuak a, Minister Dr. Vanlalthlana leh Prof. Lalnilawma ten kawngsiam hnathawh kal mek hi a hmunah kalin an vil a, Mualkhangah NHIDCL leh PWD hotute nen an inkawm a, NHIDCL hotute chuan tun dinhmuna kawng tichhe nasa ber tu pakhat chu Railway kawng sialin lei an laih chhiat nasat vang a nih thu an sawi a, Minister te hian a tul anga an lo enzui tur thu an sawi a ni.