LAWNGTLAIAH KRISMAS LEH KUMTHAR VUAKVETA HALPUAH LEH A KAIHHNAWIH KHAPNA THUPEK CHHUAH LEH KENKAWH CHUNGCHANGAH THUTKHAWM NEIH A NI

#ZONEWS Lawngtlai November 6, 2025 : Vawiin khan kumin Krismas leh Kum thar vuakveta mipuiten ralmuang leh him zawka hunpui an hman theih nan puak thei thil Halpuah, Halmawi leh a kaihhnawih chi hrang hrang khapna siam leh a kenkawh dan tur relin DC Conference Hall-ah thutkhawmna neih a ni a. Pu Donny Lalruatsanga, Lawngtlai Bawrhsap chuan thutkhawm hi a kaihruai.

Pu Donny Lalruatsanga chuan kalkhawmte hnena lawmthu sawina a nei hmasa a. Krismas leh Kum thar vuakvetah Halpuah leh a kaihhnawih hal lo turin sawrkarin thuchhuah a siam thin a; heihi mipui vangtlang him zawkna tur a nih angin, tha tak a zawm turin mipuite a ngen a. Halmawi leh puak thei thil hian mihring hriselna nasa takin a nghawng thin a, a bik takin lung tha lo leh kum lama upa zawkte tan a pawi thui em em a ni, a ti. Hunpui laiin mi zawng zawngin za len leh nuam takin hun an hmang duh theuh a, midang tana hnawk leh harsatna thlen lo zawng a awm thiam a pawimawh hle a ti. A bik takin sumdawngte chu halpuah leh halmawi zuar/hralh lo tur a chahin, sawrkar thupek zawm ngei ngei turin a chah a. Halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order) chhuah a nih huna tha taka zawm tura Lawngtlai mipuite sawmin, Bawrhsap chuan Kohhran leh Tlawmngai pawl hrang hrangte thawhpuina leh tawiawmna tha a ngen nghal bawk.

Pu PC Lalchunglura, Superintendent of Police, chuan mipuiten Krismas leh Kum thar nuam leh zalen taka an hman theih nan Police lam ten theihtawp an chhuah tur thu a sawi a. Dan leh thupek kenkawh kawngah khauh zawka kenkawh a nih tur thu tarlangin, mipuite tawiawmna a ngen a. Krismas leh Kim thar hlim taka hmang turin mipuite duhsakna a hlan nghal a ni.

Thutkhawmah hian thu pawimawh tak tak rel a ni a. District Magistrate- atangin Halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order)a hma lama siam a, puanzar thuai ni se an ti a. Veng tina YLA Information Mike- kaltlanga mipui hnenah puanzar ni se tih niin, CYLA ten hma lo la se an ti a, Tlawmngai Pawl ‘duty’ thin pawh chhunzawm tura hmalak nise an ti a ni . Magistrate, Police leh Excise department tangkawp ten dawrkai zingah halpuah leh a kaihhnawih thil zuar an awm leh awm loh endikna nei se, dan leh thupek kenkawh kawngah duty- in a tul angin khawpui chhung fangkual thin se an ti a ni. A bik takin dan zawmlote chhungah hremna khauh taka kenkawh ni se an ti a. SDO (Civil) leh BDO ten an huamchhungah theuh a tul dan angin hma lo la se tih a ni a, Kohhran tina puangzar turin Secretary theuh hnenah lehkha siam a pek nise an ti, a ni.Hunpui laiah mipuiten zalen tak a mamawh an lei theih nan ‘No Vehicle Day’ siam ve ni se an ti bawk a ni.

MJA Lawngtlai District hnenah Halpuah, Halmawi leh a kaihhnawih that lohna a zau thei ang bera puangzar tura ngenna siam ni se, Lawngtlai district – a ‘youtuber’ te hnenah an channel kaltlanga puangzar tura hmalak ni bawk se an ti a. LWA leh MHIP ten an Branch theuhah hma la turin ngenna lo siam se tiin, MUP leh LUP – ten hma lo la bawk se tih a ni a. DIPRO in Halpuah, Halmawi leh a kaihhnawih that loh zia inzirtirna video/ Flyers – lo siam se tih a ni bawk.

Vawiin thutkhawmah hian Pu PC Lalchunglura, Superintendent of Police, Pu David Lalrinawma, Addl. DC, Pu Lalhruaizela, SDC, Pu Lalrengpuia, OC  (Excise & Narcotics) , LADC – aiawh, CYLA, MUP,LUP, MHIP, LWA, VC leh Kohhran aiawhte an tel thei a, Pu Donny Lalruatsanga chuan lawmthu sawina neiin hun a khar