Lunglei West bialtu MLA Pu T. Lalhlimpuia’n a bial chhunga graduate chin chung lam hlawhtlinna changte lawmpuina a hlan

#ZONEWS August 01, 2025: Vawiin khan Lunglei West bialtu MLA Pu T. Lalhlimpuia chuan a bial, Lunglei West huam chhunga tun hnaia Under Graduate leh Post Graduate exam-a hlawhtlinna changte leh Doctor of Philosophy (PhD) hmu tharte hnenah lawmpuina leh chawimawina thilpek a hlan.

Lunglei DEO Conference Hall-a zirlai hlawhtlingte lawmpuina hun buatsaihah Lunglei West bialtu MLA Pu T. Lalhlimpuia chuan tun hnaiah Lunglei West bial chhungah infiamna leh zirnaah hlawhtlinna tam tak hmuh a nih thu sawiin, bialtu MLA a nih angin lawmawm a tih thu leh hlawhtlinna ropui tak nia a hriat thu a sawi a. Sawrkar aṭang pawhin Lunglei West bial chhungah hmasawnna hna thawh zawh tawh, thawh mek leh hmachhawp tam tak a awm tih sawiin, bial chhung hmasawnna atana thawktu leh thawhpuitute chungah lawm thu a sawi a. MLA Fund aṭangin zirna in mamawh computer leh water cooler te, zirtirtu rawihna leh zirlai zirna chhunzawmna senso te pek a nih thu sawiin, MLA Fund chu ṭha taka hman a nih thu leh endik ngama hma an lak thu a sawi a. Lunglei West puala HPC Fund dah pawh ṭha taka hman a nih thu sawiin, police station thuam ṭhat te, Govt J. Buana College building thuam ṭhat leh canteen sak te leh hmasawnna hna eng emaw zat thawh nan hman a nih thu a sawi a. ATL (Aizawl-Thenzawl-Lunglei) Road thawm ṭhat kawngah pawh hma lak mek a nih thu sawiin, cheng vaibelchhe 104.88 dah a nih thu leh fur zawh hna thawh hun (working season) a thlen veleh chak taka hma lak tum a nih thu a sawi.

MLA Pu T. Lalhlimpuia chuan thiamna nei turin pumpelh kawng a awm lo tih sawiin, zir ngawrh leh taimak a ngaih thu leh kawng chho lawn chhuak tura thahrui leh thlantui sen peih a ngaih thu a sawi a. Zirlaite leh ṭhalaite chu ram leh hnam tan zirna hmanga intuai hriam a, state dang el phak leh lehpel tura ram hmasawnna atan theih tawp chhuah turin a chah.

He huna khual zahawm, Lunglei District Bawrhsap Pi Navneet Mann chuan mihring chhawr tlak leh mahni inenkawl zo ni turin zirna a pawimawh thu sawiin, Mizoram chu zirna bul ṭhutah state dang aia ṭha, ziak leh chhiar thiam kimna (fully literate) state a nih laiin, zirna sang zawk zir chhuah lamah ṭan lak a ngaih thu a sawi a. Lunglei DC office-in education department nen ṭang tlangin zirna lama hmasawn nana hma lakna hrang hrang an kalpuite tar langin, chu’ng zingah chuan chhan eng emaw vanga zirna chhunzawm thei lote zawn chhuah a, zirna an chhunzawm dan tur ngaihtuahpui tura hma lak tum mek a nih thu a sawi a. Zirlaite chu graduate thleng tal zir chhuah tum tura chahin, zirna kawng zawh chhuah leh mahnia ding thei tura hna neih chu nu leh pate kan tana an inpekna rulh let theih dan ṭha ber a ni, a ti.

Zirlai hlawhtlingte lawmpuina hun hi Lunglei District Education Officer Pu Micky R. Lalenkawla’n kaihruaiin, Rev. Dr Raltawnga’n hunserh a hmang a. Mizo Students’ Union (MSU) Regional Headquarters Lunglei President Pu Lalthangliana, Mizo Zirlai Pawl (MZP) Headquarters Lunglei Joint Secretary Pu H. Lalhmingmawia, zirlai hlawhtlinna changte ai awh leh sawm bikte aṭangin thu sawi ngaihthlak a ni a. Lunglei District Hindi Education Officer Pu Prakash Subba chuan lawm thu sawiin hun a khar.

He hunah hian Lunglei Municipal Council (LMC)-a Councillor Pi Zonunmawii, sawrkar official-te, local council leh tlawmngai pawl hrang hrang ai awhte, political party hruaitute, zirtirtute leh zirlaite leh an chhungte an kal khawm a. Under Graduate leh Post Graduate exam-a hlawhtlingte hi lawmpuina thuziak leh laptop hlan niin, PhD hmu tharte hi lawmpuina thuziak leh pawisa fai ₹25,000/- hlan an ni.

Vawiina zirlai hlawhtling lawmpuina hlante chu:

I. Bazarveng aṭangin: 

1. Lalhruaitluangi, 1st Div (5th Rank Holder), Master of Arts (Political Science), MZU

2. C. Lalruatkima, 4th Rank, Mass Communication

3. R. Lalngaihawmi, Gold Medalist, Bachelor of Commerce

4. Donna C. Lalnunpuii, 2nd Rank, MA (Economics)

5. V. Lalmuanawmi, 4th Rank, Bachelor of Social Works

6. Lalṭanpuii Renthlei, 9th Rank, Bachelor of Arts (History)

7. Judy Lalpekhlui, 3rd Rank, Master of Science (Geography)

8. K. Lalruatkimi, 2nd Rank, B.Sc (Economics), NEHU 

9. Janet Saizampuii, 4th Rank, M.Sc (Physics)

10. Joel Lalremruata, 10th Rank, M.Sc (Geography)

II. College Veng aṭangin:

1. C. Malsawmsangi, 1st Rank, Bachelor of Pharmacy

2. V. Lalbeiseii, 9th Rank, B.Sc (Zoology)

III. Venglai aṭangin:

1. John Malsawmtluanga, 10th Rank, Computer Science

2. Zohlupuii, 7th Rank, M.Com

IV. Rahsiveng aṭangin:

1. LP Zorinpuii, 9th Rank, Master of Education

2. HC Lalneihpuii, 8th Rank, M.Ed

V. Ph.D Achiever:

1. Lalsangpuii, College Veng 

2. Lalruatpuia Ralte, Buarpui 

3. MC Zirkunga, Rahsiveng