Lungleiah Bawrhsap hovin ODOP balhla chungchanga Lunglei District-a hma lakna kal mek leh hma lak zel dan tur sawi ho a ni

#ZONEWS Lunglei August 21, 2025: ‘District khat, thar chhuah chi khat’ (One District One Product) hnuaia Lunglei District ODOP thei, ‘balhla’ thar chhuah leh sawngbawl chungchanga Lunglei District-a hma lakna kal mek thlir ho leh hma lak zel dan tur sawi hovin line department hrang hrang ai awhte chu vawiin khan Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm.

He hunah hian DC office bakah, line department hrang hrang – Horticulture, Agriculture, Commerce & Industries, DRDO, I&PR, NIC leh SELCO Foundation ai awhte an tel a. Meeting hmasa thu rel bawhzui dan leh hma lakna hrang hrang report ngaihthlak niin, ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktute tana hma lakna tur rawtna hrang hrangte sawi ho a ni.

Lunglei District Horticulture Office leh ATMA ṭang kawpin July ni 3, 2025 khan a hlutna tipung tur leh hlawk zawka deh ral a nih theih nana balhla sawngbawl dan tur zir hona buatsaih niin, balhla hmanga thil siam lama tui mi, mi 15 an tel a. He’ng mi 15 te hi a theih ang angin department aṭanga hma lakpui dan tur ngaihtuah ni se, tih a ni. 

SELCO Foundation aṭangin balhla hmanga thil siam chhuah kawnga puihna an pek theih dan leh an hma lakna hrang hrangte ngaihthlak leh thlir ho a ni a. Ni zung chakna (solar) hmanga balhla um hminna leh tihrona bakah, a sawngbawlna leh a dah ṭhatna hmanraw hrang hrang chungchang leh subsidy hmanga an pek theih dan te ngaihthlak a ni a. Lunglei District-a balhla chingtu leh thil siamtute’n SELCO Foundation kal tlanga an hma lakna zir chianna (training leh field visit) an neih theih dan tur te sawi ho a ni bawk.

He hunah hian kum 2024-2025 chhungin Lunglei DRDO kal tlangin RD block hrang hrangah MGNREGA hnuaiah balhla chingtu mi 6 hma lakpui an nih thu leh MzSRLM hnuaiah kum 2025-2026-ah Self Help Group (SHG) 3-a member mi 8 te hma lakpui tura ruahman mek a nih thu tar lan a ni bawk.