MINISTER PU LALNGHINGLOVA HMAR IN GOA CHIEF MINISTER LEH TOURISM MINISTER TE KAWM

#ZONEWS Goa November 20, 2025 : Pu Lalnghinglova Hmar, Minister of State, Tourism Department chuan nimin khan Goa Chief Minister Pu Pramod Sawant leh Tourism Minister Pu Rohan Khaunte-te chu Goa-ah a kawm a, Tourism lam hmasawnna tura state pahnih thawh dun chungchang a sawipui a, Goa-a Mizo leh Northeast mi chengte hamṭhatna turte a thlen bawk.

Tourism Minister Pu Lalnghinglova chuan Mizoram chu khualzinte tana pan chakawm leh leh mawi, tourism lama hmasawn mek a nih thu Goa Chief Minister Pu Promod Sawant a hrilh a. A ram leilung mawina bakah tlang leh ruamte chu adventure tourism leh sports tourism tan pawh remchang leh theihna zau tak nei a nih thu a sawi a; Goa chu India rama tourism lama a hmahruaitu a nih angin state pahnihte thawhdunnain hmasawnna a thlen a beisei thu leh Goa aṭangin thil tam tak zir theih a nih tur thu Goa CM hi a hrilh.

Pu Lalnghinglova Hmar chuan Goa Mizo Welfare survey atangin Goa-ah Mizo 1,500 dawn an awm tih Goa CM hi a hrilh a, Goa chu Mizoram mai bakah Northeast state dang thalai sing chuang tana eizawnna siamsaktu a ni chu lawmthu a sawi rualin heng hnathawkte himna tur leh mamawh huna an koh theih tur Goa sorkarin siam se tih rawtna a thlen.

Goa Chief Minister chuan Mizoram Tourism Minister chu tha taka lo dawngsawngin, Tourism lama thawhhona chu a taka kalpui theih a nih tur thu a sawi a; Mizo leh hmarchhak aṭanga hnathawkten harsatna an tawha an biak pawh tur Chief Minister Office-ah ruat nghalin Mizoram Tourism Minister nen a inhmelhriattir a, Goa Mizo Welfare htuaitute nena inhmelhriattir zui turin a chah nghal bawk.

Mizoram Tourism Minister leh Goa Tourism Minister Pu Rohan Khaunte te pawh nimin vek khan inkawmin, state pahnih tourism hmasawnna’na thawh dun theihna hrang hrang an sawi dun.

Goa-in tourism atana digital platform hrang hranga a neihah Mizoram-a tourism hmunhma leh event tarlan ve te, tourism leh hospitality lama exchange programme neih te, tourism kaihhnawih skill development lama thawhdunte bakah state pahnih tourism tihlar kawnga thawh dun chungchanga Mizoram Tourism Minister rawtna thlente an sawi dun a ni.

Pu Rohan Khaunte chuan Mizoram Tourism Minister hi lawm taka lo dawngsawngin thawh dun theihna an neihte chu zirchianga tihhlawhtlin ngei an tum tur thu a lo hrilh a. Hmalak chhunzawm dan turah state pahniha Tourism Department hotute lo indawr chhunzawm nise tiin an sawi dun a ni.

Pu Lalnghinglova Hmar hian nizana Goa Mizo Welfare buatsaih ‘Zo Zan’ a hmanpui a; Goa-a hnathawk Mizo ṭhalaite taimakna a fak a, mi state-a cheng an nih anga mawi taka awm tur leh, Mizoram lama an chhungte ngaihsak thiam turin a chah a, an thawh chhuahte khawla chhungte tana ṭangkaia nun zir turin a chah.