NEW DELHI A ALL INDIA SPEAKERS’ CONFERENCE AH MIZORAM ATANGIN SPEAKER LEH DY. SPEAKER TE AN TEL

#ZONEWS August 25, 2025 : August 24 – 25, 2025 chhunga neih tur All India Speakers’ Conference, Delhi Legislative Assembly a neihah Mizoram Legislative Assembly aiawhin Pu Lalbiakzama, Speaker leh Pu Lalfamkima, Dy. Speaker te an tel.

He conference-ah hian India ram a state tin Legislative Assembly Speaker leh Dy. Speaker te an kalkhawm a. Conference motto chu ‘Commemoration of Centenary of Veer Vithalbhai Patel’ tih a ni a. India mi Central Legislative Assembly President/Speaker atana thlan (elected) hmasa ber kum 100 tlin lawmna hun hman a ni. Hemi hun ah hian VITHALBHAI PATEL Postage Stamp tlangzarh nghal a ni.

Pu Lalbiakzama pawhin thu sawiin Vithalbhai Patel ropuina leh ram tan a inpekna thukzia a sawi rualin State thenkhat ten Assembly a Bill an pass te Governor thenkhat in political thil avang a assent an pe mai thin lo a an sawi chu a ngaimawh thu leh Indian democracy ropuina kan sawi rual hian democracy hi beih in a awm em ni ? tiin kalkhawmte a zawt a. Democracy hi kan humhalh tlat a pawimawh em em a ni tiin kalkhawmte a sawm bawk.

Union Home Minister Pu Amit Shah te, Union Minister of State for Parliamentary Affairs Pu Kiren Rijiju te, Delhi Chief Minister Pi Rekha Gupta leh India sorkar hruaitu mi pawimawh engemaw zat an tel a ni.

August 26, 2025 ah Speaker leh Dy. Speaker te hi Aizawl rawn let leh tur a beisei an ni.