PHED MINISTER LEH SPORTS MINISTER TEN VAIVAKAWN ZOHNUAI-A LEI TLAHNIAM AN TLAWH – AIZAWL KHAWPUIA TUI HARSATNA SUT KIAN DAN TUR REL A NI

#ZONEWS July 18, 2025: Vawiin khan Public Health Engineering Department Minister, Professor Lalnilawma Khiangte leh Minister Pu Lalnghinglova Hmar, Aizawl West-II bialtu MLA ni bawkte chuan Vaivakawn (Zohnuai) lei tlak hniamna hmun an tlawh a, lei chein a tih chhiat Aizawl khawpui hmar lam chawmtu Aizawl Water Supply Phase – III, tui pipe chhia siam that dan tur chungchang ngaihtuahin an thukhawm. He hunah hian PHED, SIPMIU, DC Office leh DM&R atangtein sawrkar mi pawimawhte an tel bakah Vaivakawn, Zohnuai khawtlang hruaitute leh lei chet avanga harsastna tuartute an tel a ni.

Prof. Lalnilawma chuan thu sawiin Vaivakawn, Zohnuai khawtlangin harsatna an tawrh mek chu a tuarpui thu a sawi a, lei chein a tih chhiat tui Pipe chu Aizawl khawpui chawmtu pawimawh tak pakhat a nih avangin a rang lama chinfel thuai a nih theih nan hmalak mek a nih thu a sawi.

Zohnuai lei che hian Aizawl khawpui hmar lam chawmtu (Phase III water supply) tui pipe ti chhiaiin, tui a put a, he tui put hian lei che a ti zualkai nia hriat a nih avangin tun dinhmunah Phase – III Water Supply; ni tin tui 10-12 MLD pump thin chu khar a nih thu a sawi a. Report-a a lan danin nitina Aizawl khawpui tui mamawh zat chu 31.53 MLD a nih thu a sawi bawk.

Vawiin rorel inkhawmah hian khawtlang hruaitute nen hmalak dan turte rel ho a nih hnuin tun dinhmunah Aizawl mipuite tui harsatna sut kian a nih theih nan SIPMIU tui Pipe chu kawng sirah kal tir rih a ni ang a, veng chhung mite tana him leh harsatna awm lo thei ang berna turin hmalak rel a ni.

Hun kaihruaitu, Minister Pu Lalnghinglova Hmar, Bialtu MLA ni bawk chuan Vaivakawn Zohnuai mipuite dinhmun khirh taka an awm chu a tuarpui thu sawiin, an harsatna chinfel a nih theih nan sawrkarin hma a lak zel tur thu sawiin hun hi a khar a ni.