RD&A Minister Prof. Lalnilawma’n Regional SARAS Fair Lunglei, 2025 a hawng

#ZONEWS Lunglei December 9, 2025: Mizoram sawrkar Rural Development & Administration (RD&A) Department hnuaia Mizoram State Rural Livelihoods Mission (MzSRLM) huaihawta December ni 9 – 13, 2025 chhunga Lungleia Saikuti Hall Ground Floor-a Regional SARAS (Sale of Articles of Rural Artisans Society) Fair vawi 12-na buatsaih tur chu vawiin khan RD&A Minister Prof. Lalnilawma’n a hawng.

Khuallian, RD&A Minister Prof. Lalnilawma chuan sawrkar laipuiin kum 1999-a thingtlang mi retheite khai chhuah nana mahni inṭanpui pawl (self help group) dinna tur ruahmanna SGSY a kalpui ṭan dan leh kum 2013-a MzSRLM kalpui a nih chhoh dan tar langin, chu’ng hma lakna hnuaiah chuan SHG dinhmun zir chianna, ei tur sawngbawl dan zirna leh SHG-te hmasawnna tura hma laknaah te a lo tel tawh dan te a tar lang a. Kum 2013-a sawrkarin bul a ṭan chhoh lai ngaihtuahin tunah chuan SHG nuho thil siam chhuah chhuanawm tak tak pho chhuah tham a awm tawh thu sawiin, chhungkaw hmasawnna turin nuho sum lak luh tihpun a pawimawh tih hriatna aṭangin MzSRLM hnuaia SHG hma lakna chu ruahman a nih thu a sawi a. MzSRLM hma lakna tam tak zingah Lakhpati Didi hnuaiah thingtlang nute’n kum 1-a nuai 1 tal an lak luh theih nan hma laksak mek an nih thu te, nuho thar chhuah leisak a, zuar chhawng turin Ropuiliani Women Farmer Producer Company kal tlanga hma lak a nih thu te, Mizoram thar chhuah state pawna thawn chhuak turin kawng hrang hranga hma lak a nih thu te a sawi.

RD&A Minister Prof. Lalnilawma chuan thil thar chhuah leh siam chhuah deh ralna kawngah market ṭha leh ngelnghet a awm theih nan rinawmna a pawimawh thu sawiin, kan thil hralh chhuah chu a rin tlak tur a ni, a ti a. MzSRLM hnuaia SHG nuho kut chhuak leh thar chhuah chu a lan danah a mawi tawh viau tih sawiin, a ṭhat dan (quality)-ah ṭan lak a, a leitute’n an zawngchhang tlaka siam chhuah a pawimawh thu a sawi a. Thei leh thlai thar chhuahte a nih ang anga hralh chhuah a hlawk tawk loh thu leh ei leh in atana sawngbawla deh ral a hlawk zawk avangin thei leh thlai sawngbawl lamah ṭan lak a ngaih thu sawiin, MzSRLM hnuaia SHG-te kut chhuak quality ṭha, ram danga zawrh tlakah Sel Hel brand hminga hralh chhuak tura hma lak a nih dan a tar lang a. Tualchhung thil thar chhuah leh siam chhuahte inhlutsak a pawimawh thu sawiin, ei zawnna insiamsakna leh inchawi kan tawnna a nih avangin an mamawh zawng a nih chuan an thil zawrhte leisak zel turin mipuite a chah a. Kut hna thawktu ti tak takte chu RD&A Department-in theih tawp chhuaha hma a lakpui ṭhin thu leh hma a lakpui zel tur thu sawiin, tualchhung mamawh intodelh thei tura hma lak a, chumi aṭanga ram danga deh ral tlak leh thawn chhuah tham thar chhuak turin ṭan lak a ṭul thu a sawi.

Regional SARAS Fair Lunglei hawnnaa Khual Zahawm, Lunglei South bialtu MLA Pu Lalramliana Papuia chuan mahni thiamna leh ṭhahnem ngaihnaa ei zawnna kawng zawh turin khai chhuaktu leh kawng sialsaktu kan mamawh ṭhin tih sawiin, mahni phak tawka bul ṭan vete sawrkar tha chaknaa MzSRLM leh SHG kal tlanga an bana kai chhuak a, hma lakpui an ni chu lawmawm a tih thu a sawi a. Ding chhuak turin hriat hlawh nih a ṭul thu leh inpho chhuah thiam a pawimawh thu sawiin, inpho chhuahna ṭha Lungleia SARAS Fair buatsaih a ni chu lawmawm a tih thu leh rah ṭha chhuah a, thil siam chhuaktute phurna thar petu ni se a duh thu a sawi.

Regional SARAS Fair Lunglei 2025 hawnnaah hian Lunglei Municipal Council (LMC) Vice Chairman Pu K. Lalrinawma leh councillor-te, sawrkar official-te, MzSRLM-a thawkte leh SHG member-te, political party hruaitute, tlawmngai pawl ai awhte, chanchinbu mite leh zirlaite an tel a. Lunglei District Additional Deputy Commissioner Pi Zoramdini chuan inlawmna thu sawiin, MzSRLM Chief Executive Officer Pi Zosangzuali Pachuau chuan report a pe a. MzSRLM Chief Operating Officer Dr Zomuankima’n lawm thu sawiin, Minister chuan puan them kaih (ribbon) chep chatin Regional SARAS Fair Lunglei hi a hawng a ni.

MzSRLM CEO report aṭanga a lan danin, MzSRLM hi kum 2013-ah Mizoramah kalpui ṭan niin, tunah hian district 11-ah, RD block 28-ah leh khaw 721-ah an lut tawh a. SHG 11,257 din tawh niin, member 81,030 an awm mek a, Village Organisation (VO) 759 leh Cluster Level Federation (CLF) 84 din a ni tawh bawk a. Thingtlanga mi rethei zawkte khai chhuah nan SHG kal tlang hian bul ṭanna sum, training leh kaihhruaina hrang hrang pek an ni a. SARAS Fair hi Mizoramah kum 1-ah vawi 2 buatsaih ṭhin niin, a vawi 1-na Aizawlah leh a vawi 2-na chu District dangah buatsaih ṭhin a ni.

Regional SARAS Fair Lunglei 2025-ah hian Mizoram hmun hrang hranga Self Help Group (SHG)-te’n an thil thar chhuah leh siam chhuah hrang hrangte zuarin an pho chhuak a. He SARAS Fair hi SHG member hmeichhiate’n sum lak luh tam zawk leh ei zawnna ngelnghet zawk an neih a, Lakhpati Didi tam zawk an awm theihna hmanraw pakhat atana buatsaih a ni bawk.

Regional SARAS Fair Lunglei 2025-ah hian Mizoram RD Block 24 aṭangin SHG 84 telin, dawr (stall) 41 siam a ni a. He’ng stall-ahte hian item chi hrang hrang – puan, thing (teak) hmanga inchhungkhur mamawh siam (dawhkan, board leh a dangte), ramsa lem, ip (bag), sahbawn (hand-made), kamram (chips) chi hrang hrang, thei tui, thingpuife, buhban leh thil dang eng emaw zat chu man tlawm zawka zawrh leh pho chhuah a ni a. Bazar paha thil ei duh tan ei tur tuihnai tak tak chhawp chhuah ni bawkin, naupang intihhlimna tur leh infiamna a awm bawk a. December ni 9 – 13, 2025 chhungin zing dar 10:00 aṭanga zan dar 7:00 thleng dawr theihin hawn ṭhin a ni ang.

RD Block hrang hranga Block Mission Management Unit (BMMU) kal tlangin Regional SARAS Fair-a SHG tel turte hi thlan niin, Fair-ah hian SHG-te kut chhuak leh thar chhuah chauh pho phal a ni a. Bungraw tuamna (packaging) pawh chhehvel boruak tana him (environment-friendly) chauh hman phal niin, ei turte pawh FSSAI standard anga siam chauh zawrh phal a ni a. Pawisa fai (cash) hmang lo va, khawl hmanga indawr theihna tur ruahmanna (QR code) te pawh siam a ni.

RD&A Department leh MzSRLM chuan Regional SARAS Fair hi tlawh tur leh SHG-te thil pho chhuahte leisak turin mi zawng zawng an sawm a ni.

Attachment