REI TAK CHHUNG NGAWI RENG LEH REH HMIAH ANGA LANG HNUAIAH PAWH, RINNA CHUAN PATHIAN HUN RUAT NGHAK THEI TURIN BEISEINA NUNG MIN NEIH TIR ṬHIN

#ZONEWS #FIANRIAL AUGUST 28, 2025:
REI TAK CHHUNG NGAWI RENG LEH REH HMIAH ANGA LANG HNUAIAH PAWH, RINNA CHUAN PATHIAN HUN RUAT NGHAK THEI TURIN BEISEINA NUNG MIN NEIH TIR ṬHIN

Vawiina kan fianrial hunah chuan Baptistu Johana chanchin leh Isua pian tur puan lawk chungchang thu kha ngaihtuah teh ang. Pathian chuan kum 400 chhung zet mai ngawi renga a awmna chu Zakaria leh Mari te hnenah kawng sialtu tur leh Messia pian tur thuchah hmangin a rawn titawp ta.

BAPTISTU JOHANA PIAN THU

A ni, Taite, nang hi Chungnungbera zawlnei an ti ang che; A kawngte siam turin Lalpa hmaah i kal dawn si a; (Luka 1:76).

Beiseina pawh bo rum rum khawpin thil eng emaw hun rei tak chhung nghah i nei ve tawh ṭhin em?

Kum 400 chhung zet mai zawlnei te thu leh hla engmah hre zui tawh lo Israel mite kha ngaihtuah ila. Puithiam Zakaria chu Temple-a rimtui hal tura thlan a ni a. A tihtur a tih mek laiin vantirhkoh Gabriela chuan Zakaria kha tichih vek thei khawpa thu mak a rawn puang ta; Amah leh a nupui Elizabeth-i te chuan fapa an nei dawn a, chu an fapa chuan Lalpa kawng a la sial sak dawn a ni.

Pathian thutiam tihkhawtlai anga a lan changin engtin nge kan chhan let ve ṭhin le?

Zakaria chuan a tirah a rinhlelh avangin eng emaw chhung atan tawng thei lovin a awm phah a, he thil thleng hian Pathian hun tiam leh ruat chu ring turin min hriattir nawn leh a ni. Chutih mek laiin Elizabeth-i laichin unaunu, Mari chuan Gabriela hnen atangin, nula thianghlim ni chunga Isua Krista a pai tur thu a dawng ve bawk a. In ngaitlawm tak maia chu kohna mak chungchuang tak mai Mari’n a lo pawmna khan rinna leh thuawihna thuk tak mai awmzia a lantir a ni.

Pathian kohna Mari’n a chhan dan atang hian eng zirlai nge kan zirchhuah ve theih le?

Thil nihna chipchhiar taka hrethiam miah lo chunga Pathian rawng bawl a remtihna leh duhna hian Mari rinna thuk tak mai chu a lan chian tir hle mai. Chutiang bawkin kum upa leh tar lam tawh, Elizabeth-i’n mak tak maia nau a pai leh hian, harsatna zawng zawng laka Pathianin a thutiam tithlawhtling tura thil a tihtheih zia a tarlang chiang hle. Heng thil thleng te hian, Pathian ruahmanna te chu kan hriatthiam phak bak a nih fo ṭhin zia leh, kan rinna leh inpekna A mamawh mai a ni tih uar takin min hrilh a ni.

Johana leh Isua pian chungchang thu hian eng tiang chiah in nge keini hi min fuih nia kan hriat ve le?

Ngun takin khang thil mak tak mai thlengte kha ngaihtuah ila, Pathian thutiam leh ruahmannate chu a hlawhchham ve ngai lo tih min hrilh nawn a ni. Hun rei tak chhung kan nghak a ni emaw, eng nge a dinhmun chiah chiang lo pawh ni sela, Pathian chuan hna a thawk reng a, A ruahmanna angin thil a ti reng thin a ni. Keini tihtur chanvo chu, rinawm taka Pathian hun ruat lo nghah leh, inngaitlawm leh huaisen taka A kohna lo pawm hi a ni.

NGUN TAKIN INNGAIHTUAH ILA

Kan nuna Pathian thutiamte ngun takin ngaihtuah ila. Pathian chuan hna a thawk reng a ni tih kan hmuh thiam miah lohna te a awm em?

Dinhmun mak chungchuang tak mai rinna hmanga hmachawntu Zakaria leh Mari te kha kan hre reng ṭhin dawn nia.

Dawhtheihna nei a, Pathian hun ruat chu ring tlat thei turin Pathian hnenah ṭawngṭaiin dil ang aw.

ṬAWNGṬAINA

Nimahsela vantirhkoh chuan a hnenah, “Zakari, hlau suh, i dil kha a hria asin, i nupui Elizabetin fapa a hrinsak ang che, a hmingah Johana i sa tur a ni (Luka 1:13).

Aw Lalpa, ka nuna thil lo awm la awm tur atana I hnena dilna ka thlen hian, ka dinhmun leh nihna thlir ka duh lova, Zakaria anga ring lova nuih lah ka duh hek lo. Rin lohna avanga Zakaria anga ka hmui phuar saka ka awm loh nan,  Mari anga ka hnena I thutiamte chu pawm theih zel ka duh e. Baptist-tu Johana anga, ka nuna I kawng min sial saktute min pek ṭhin avangin lawmthu ka hrilh che a, min la pe zel dawn a ni tih ka ring e.  I thu keimaha I tuh tawh chu chatuan atana a nun theih nan, Isua hmingin ka dil e, Amen!