Saitualah Teachers’ Day 2025 lawm dan tur rel a ni.

#ZONEWS Saitual August 20, 2025: Vawiin khan DC Conference Room, Saitualah District Level Committee on Celebration of Teachers’ Day 2025 chu an chairman, District Bawrhsap ni bawk, Dr. Lalngura Tlau kaihhruainain Teachers’ Day 2025 lawm dan tur relin an thu khawm.

He huna hian Saitual Bawrhsap Dr. Lalngura Tlau chuan thu a sawi a, zirna chu kan vaia tanrualna a ni tih sawiin, zirnain hma a sawn theih nan chuan zirtirtute chauh an tel lo a, nu leh pa te, khawtlang hruaitute leh sawrkar department hrang hrang te an tel a ni, a ti. Bawrhsap chuan zirtirtute tel loin khawvelin hma a sawn thei lo, a ti a, zirtirtute niah pawh hian zirtirtute dah pawimawh a, chawimawi a tul a ni, a ti. Zirtirtute ni lawmna hun hlawhtling taka hman a nih theih nan theih tawp chhuah turin kalkhawmte chu a fuih nghal a ni.

Vawiin thutkhawmah hian kum danga la tih ngai loh angin kumin Teachers’ Day lawmna pui ber chu September ni 4 hian Dorawta Hall, Saitualah hman ni se tih rel a ni a, he hunah hian Saitual Town Area-a zirtirtu thawk mek leh pension tawh te pawh tel vek tura rua hman a ni ang. Ngopa leh Phullen-ah te pawh BDO leh SDEO hmalaknain Teachers’ Day lawmna hi hman a ni dawn bawk a ni. Hemi ni hian Saitual District-a hmun hrang hrangah te zirtirtu chawimawina banner tar a ni bawk ang.

Vawiin thutkhawm hi District Level Committee on Celebration of Teachers’ Day 2025 chairman, District Bawrhsap ni bawk Dr. Lalngura Tlau chuan a kai hruai a, Pu Laldingliana, DEO & DPC, Member Secy ni bawk chuan nikum lama National Foundation for Teachers’ Welfare fund luh dan te leh Teachers’ Day an hman dan te report a pe bawk. He hunah hian khawtlang hruaitute leh District Level Committee on Celebration of Teachers’ Day 2025 member te an tel a ni.