Siaha-ah Thawnthu insawisiak hmanga intihsiakna (District Level Story Telling Competition) buatsaih a ni

#ZONEWS 25th July 25, 2025 Zirtawpni: Vawiin khan DRDO Conference Hall, Siaha-ah Mizoram Tourism Department buatsaih District Level Story Telling Competition buatsaih a ni a,SDO (S) Pu Vanlalchhuanliana chuan he hun hi a kaihruai a ni.

Addl DC Pu Abraham Beirazi Khithie chuan thawnthu insawisiaknaa tel te chungah lawmthu a sawi a, he inelna buatsaihtu Tourism Department te chungah lawmthu a sawi bawk. Siaha District chuan khualzinte hip theihna tur potential tam tak a nei a, chumi phochhuak thei tur chuan participant-te chu tang se, District level bakah State level a inelna neih turah pawh theihtawp chhuah tura ngenin duhsakna a hlan nghal bawk a ni.

He inelnaah hian Siaha District chhunga hmun langsar zual pasarih (7) thlanchhuah a ni a, chung te chu: 

1) Pala lake

2) Mawma tlah

3) Castle of Beino

4) Pala Wetland

5)Tokalo Wildlife Sanctuary

6) Siata village

7) Lorraine ville, Saikao, te an ni.

Heng bakah hian District chhunga hmun langsar zual mahni duh zawng chanchin a sawi theih a, Kaopi (Tisi) chungchang thawnthu ngaihthlak a ni bawk a ni.

Vawiin inelna endiktute chu Pu Pachi Hlychho, Mara Literature Board Vice chairman, Pu JB Chozah, Art & Culture Promotion Officer, MADC leh Pu T Chatlua, Addl DPC (Samagra Shiksha, Siaha) te niin an hnen atangin judging criteria bakah participant-te fuihna thu tawi ngaihthlak a ni bawk a ni. Pi P Chaki, MCHP Gen Hqrts President chuan concluding remark a pe a, lawmman pakhatna dawngtu chu State levela an inelna ah lang pha turin inpuahchahna tha neih a tul takzet a ti a, chezia bakah aw-rawl chhuah dan leh mipui hip thei tura inpuahchah thin turin a fuih bawk a, SDC Pi Zorinsangi hnen atangin participant te fuihna thu tha tak ngaihthlak a ni bawk a ni.

District Level Story Telling Competition a lawmman dawngtu te chu:

 1) Zine P Fachhai- Pawisa fai cheng 10,000/- leh Certificate 

 2) J Vanlalhruaitluangi- Pawisa fai cheng 8,000/- leh certificate 

 3) Monica Laldinpuii- Pawisa fai cheng 5,000/- leh certificate

Vawiina lawmman pakhatna dawngtu hian August Ni 8 a neih tur State Level Story Telling Competition ah Siaha District ai awhin inelna a hmachhawn leh dawn a ni.