THLARAU LAMA ṬHANLENNA CHU PATHIAN THUA TUIHALNA TAK TAK ATANGIN A INṬAN A NI.

#ZONEWS #FIANRIAL SEPTEMBER 02, 2025:
THLARAU LAMA ṬHANLENNA CHU PATHIAN THUA TUIHALNA TAK TAK ATANGIN A INṬAN A NI.

Vawiin kan fianrial hunah chuan kalhlen kut laia Isua la naupang te mai Biak ina Pathian thu ngaihven leh zira a chamban chungchang kha ngaihtuah ila. A nu leh pate khan an ngaihtuah em em laiin, Naupang Isua erawh Pathian thu zira zawhnate zawt leh chhangin Biak inah khan a lo khawtlai tih kan hria a ni. Isua khan a tihtur pawimawh tak mai kha hma takah a hre thiam tawhin, finnaah a thang lian zela, Pathian leh mihring duhsakna pawh a chang zel a ni tih kan hre thei a ni.

NAUPANG ISUA
Tin, Isua chu a fing deuh deuh va, a lo lian telh telh a, Pathian leh mihring duhsakin a awm deuh deuh va (Luka 2:52).

Kum naupang zawk i nih lai atangin eng nge i nun chhan tihte nasa takin i ngaihtuah ve tawh thin em? Pathian thu hriatnaa thanlen zel hi i duhin i chak ve thin em?

Isua chu mipa naupang chauh nimahsela a hna leh tihtur kha a hrethiam hle tawh a ni tih chiang takin a lan tir a. Kum tina an tihdana kal hlen kut an hman zawh hnua Jerusalem an chhuahsan khan, Mari leh Josefa te chuan Isua an zingah a tel ve lo tih an hrechhuak a. Mangang taka ni thum chhung ngawt an awm hnuah, Temple-ah an va hmu a, puithiamte nen uluk leh khunkhan takin Pathian thu an lo sawiho tih an va hmu a ni.

Naupangte ni chunga Isua a thiltum leh a la tihtur atana a inpekna atang hian eng nge kan zir ve theih le?

Kum naupangte ni chungin Pathian thu a hriatthiamna leh zirtirna atana a inpekna thuk tak chu a lantir a. Pathian thu zir a chakna leh a zawhna thuk leh ril tak tak chuan Juda sakhaw zirtirtute mak tih a hlawh hle a nih kha. Kan thlarau lam thanlenna tura naupan deuh lai atanga inchher pawimawh zia leh taima taka Pathian atanga finna zawn chhunzawm zel pawimawh zia a lantir a ni.

I vela awmten i tana Pathian ruahmanna awmzia an hrethiam vek lo a ni tih i hria a, engtin nge i tih ang le?

Mari leh Josefa te khan Isua thiltih chu an hrethiam vek lo a, nimahsela Isua khan an thu kha a awih em em tho a ni tih kan hria a, thuawih takin Nazareth lamah a kir ve leh mai a. A tihtur pawimawh tak kha hre reng chungin A lei lam nu leh pate thu kha a awih em em tho a, hei hian midangte nen kan inlaichinnaah thuhnuairawlhna leh intukluhna pawimawh zia min zirtir a ni.

Midangte leh Pathian duhsakna changa, finnaa thang zel turin engtin nge hma kan lak ve theih ang?
Isua, kawng hrang hrang – finna, midangte nena nunhona kawnga a than zelna leh, Pathian leh mihring duhsakna a chang chho zel hian, thlarau lam nun kawnga inpumpekna, finna leh midang nena nunhona kawngah te inbuk tawk taka than len chhoh dan awmzia a takin min zirtir a ni. Isua naupan lai hun kan ngaihtuah let chuan, kan rinnaa than chhunzawm zela, kawng tin renga Pathian chawimawi nun neihna kawng zawn zel pawimawh zia leh chutiang ti zel tur chuan min hriattir nawn a ni.

NGUN TAKIN INNGAIHTUAH ILA.
Kan thlarau thanna tura kan zin kawng kha uluk takin ngaihtuah ila, finna leh Pathian leh mihring duhsakna chang zel tura kan than theihna lai turte ngaihtuah bawk ila. Hriatthiamna nasa zawka kan zawn a, inngaihtlawmna nasa zawka kan lantir a tulna lai ni a kan hriatte engte nge ni le?

Pathian nena kan inlaichinna thuk zawka a than zel theih nan, tawngtai a, A thu zir leh mahni nun in enlet chung zelin nasa zawkin inpe ang aw. Isua pawh khan Pathian thu zirna leh, A nu leh pate thuawihna hmangin kan tan entawn tur a lo siam tawh a ni.

ṬAWNGṬAINA
Tin, nausen chu a lo sei lian deuh deuh va, a lo chak telh telh a, finin a khat ta a, Pathian khawngaihna a chungah a awm bawk a (Luka 2:40).

Aw, Lalpa, Isua anga nitina finna leh hriatthiamnaa thang lian zel thei tura I thu thianghlim min pek avangin lawmthu ka hrilh a che. Ka bul vel a miten hrethiam lo mahsela nangma min kohnaa nghet taka din zel ka duh e. Nitina Isua chauh en a, Amah nen inrintawkna nena kan kal dun zel theih nan, Isua hmingin ka dil e, Amen!