SUM ENKAWL THIAM LO FINANCE MINISTER KAN NEI HI A PAWI – MNF

#ZONEWS #POLITICS August 02, 2025:
July 30, 2025-a ZPM thuchhuaha PMMSY kaltlanga Mizoramin cheng nuai 1000 kan dawn tawh chungchanga thil awmzia an tarlang khan, an sorkar chet muan zia leh sangha dil neitute hmakhua an ngaih tawk lohzia an tarlang lek fangah MNF chuan a ngai a. Sorkar hma atanga ‘tha bik, danglam bik’ ni tura insawi a, research base anga kal tum, lehkhabu chhah hmanga sorkar tuka kal tumten rahbi an tuk fuh lohzia a lo lang leh thin hi a pawi kan ti a. Sorkar laipui hotute ngaimawh khawpa an che pelh hi a mak lova, finance changtuin a enkawl hneh tawk lohzia a langchiang hleah kan ngai a, sum enkawl thiam lo Finance Minister kan nei hi a pawi hle.

Hetiang harsatna hi department dang pawhin ZPM kaihhruai sawrkar hnuaiah hian an tawk foin a rinawm a. Sorkar laipui chuan sangha Dil neitute tanpuina tur cheng nuai 1000 zet mai April 2025-a a rawn pek tawh, Mizoram sorkar inthlahdah vang leh sum enkawltu leh a changtuin a vil hneh loh vanga hun rei tak tangkhang a ni tih anmahni thuchhuah hian a tarlang chiang viau a ni. Hei vang hian Sorkar laipuia Secretary Dr. Abhilaksh Likhi, Ministry of Fisheries, Animal Husbandry & Dairying, Department of Fisheries chuan July ni 22, 2025 khan Mizoram sorkar hnenah lehkha ( D.O No. J-01011/4/2020-Fy Dated the 22nd July 2025 ) thawnin, PMMSY kaltlanga sanction tawh nuai 1000 hmanna tura hma an lak loh chhan a zawtfiah hial a ni.

Enkawl thiam loh avanga he sum hi tangkhang a ni tih hi kan sawrkar hian lo hre nawn leh se. Kan sorkar, kalphung thar zuartu, road map neisaa kaltumte hi rim taka thawk, kuthnathawktute sum tur sorkar laipui rawn pek an hnen thleng tura hna thawk tha lo, sorkar laipuiin hma la thuai tura a rawn nawr ngai an nih avangin, hemi hian Sum enkawl thiam lo Finance Minister leh a puibawmtu kawnghmang hre tawklo kan nei a ni tih a tilang chiang hle a ni. Insawifiah renga hun hman ngai lo turin an inzawrh ang ngeia hnathawk tawh turin ZPM kaihhruai sawrkar hi kan phut a ni.

MNF chuan thil kalhmang hre chungin, Central leh Opposition te nawrkal chawp ngai sorkar kan neih avang leh Sangha dil neitute hmakhua ngaiin, an sum dawn turte an hnena thleng thuai turin hma kan la a ni. April 2025 a Mizoram sorkar hnena mother sanction lo thleng tawh July 2025 a reminder thawn ngai sorkar kan nei hi a chhangchhiat thlak kan ti takzet a. Hetiang thil hi thleng nawn tawh lo se kan duh tak zet a ni.

Sd/-
(LALLIANZUALA FANAI)
Joint Secretary
Media & Publicity Department
Mizo National Front
Memo No. 301/2025
Dt. 02.08.2025