ZANIN KA LENG HAW RILRU CHU… – Robert Lalduhzuala

Zanin chu zan awl ka neih avangin kan Bial (Upa bial) lamah chhungkaw tlawhna hun remchangah hmang teh ang ka ti a, Kohhran thil pawimawh tih tur a awm tel tho bawk avangin ka tei chhuak ta a. Tichuan chhungkaw tlawh tur ang ang te tlawh zovin leh thil pawimawh tih tur te ka ti zova ka haw chho ta a, haw kawngah chuan ala tlai lo bawka tiin kan Kohhran Secretary te In ka haw kawngah a awm bawk avangin ka tlawh kawi ta a.

Amah alo awm remchang bawk a, kan pahnih chuan kan titi a, Kohhran thil pawimawh te sawiin, Kan rawngbawlna chanchin te, KTP an nih lai chanchin te kan sawi zui a, kan pahnih te chuan kan titi tui em em a, kan nui kan nui bawk a, Sana ka’n en chu dar 10 a lo hnaih dawn tak mai avang chuan haw zai ka rel ta a, Gate thlengin min thlah a, kan in mangtha ta a ni.

In ka thlen hnu chuan zanin ka hun hman dan chu ka ngaihtuah let a, ka inhriat miah loh hian tun hun a ka hun hman dan ang hi ka lo ni reng ta mai tih ka in hrechhuak a, heti hian ka ngaihtuah zui ta zel a.

Kum reilo te emaw kan tih chhungin kan kum a lo tam ve tial tial a, hun alo her liam zung zung mai hi a lo ni. Hmanah kha chuan zan awl kan neih chuan thiante nen programme hrang hrang kan siam a, kan lengchhuak a, thiante In, Khawpui chhung leh khawpui daifem thlengin kan hrut chhuak a, hlim takin hun kan hmang a, dar zat khan kan nunah thu a sawi tam lo thin hle.

Rual kawm nuam ti chi ka lo ni bawk nen, thian circle hrang hrang ka ngah ve thin hle a, hun hrang hrangah, hmun hrang hrangah zanawl chu zanawl a siam hman lo lekin kan thatlai hun kan lo hmang ve thin. Ka hun hmanna tam ber erawh thalai rawngbawlna a ni thin.

#zonews #article #supertrio #robertlalduhzuala