Revd Dr. H. Killuaia chu Ropui takin an chenna hmun Chanmari, Lungleiah vui liam a ni ta.

#ZONEWS JUly 12, 2025: Rev. Dr. H. Killuaia, Baptist Church of Mizoram (BCM) Pastor senior leh Mizo Thu leh hla (Mizo Literature) leh Theology lama Mizote rohlu tak mai, Lehkhabu 30 ziaktu leh Pathian fakna hla 84 zet mai phuahtu chu, an chenna hmun Chanmari, Lunglei Biakinah vuina hunserh hman niin, ui takin July 12, 2025 chawhnu dar 1:00 khan thlah liam a ni ta a ni.

Pu H. Killuaia hi Pneumonia leh a chuapa tuitling avangin July 11, 2025 khan kum 87 mi niin, Trinity Hospital, Aizawl-ah a thi a. A ruang hi an chenna hmunah phurh phei nghal niin, an chenna hmun, Chanmari,Lunglei thlanmualah vui liam a ni ta a ni.

Pu Killuaia hian langsar taka uitu a ngah hle a, Mizoram hruaitu lar tak tak, Pathian thu hriltu tam tak, Pathian fakna hla satu (Gospel singer) lar tak tak te leh mi tam takin Social Media lamah an ui thu an ziak hlawm a ni.

Revd Dr. H. Killuaia hi August 22, 1939 khan Chawnhu khuaah a piang a. A pa hi Mangsaia niin, a nu chu Lawngdawhi a ni. An unau hi 16 an ni a. Mipa 13 leh hmeichhia 3 an ni. A naupan lai atanga naupang chak leh hrisel, huaisen tak, a thiltih tum tawh chu hlawhtlin ngei ngei tum mi a ni.

Kum 1953 khan Chawnhu Tuikhurah PAstor Thanzinga’n baptisma a chan tir a. Chhandam nih inhriatnain Zoram a tuam chhoh lain Chawnhu khuaah Upa Sangluaia (Paithar) hovin camping buatsaih a ni. September ni 6, 2963 zanlai dar 12-ah chhandam nih inhriatna a chang a. Kum 1965-ah Bangladesh (E. Pakistan) Mire ramah Ramthim Board, Lawngtlai tirhin a kal a. Kum hnih chhung Comilla Central Jail-a a zu tan hunin 1967-ah a rawn chhuak a. Jail atan chhung hian a thi tawa ngaih a nih avangin a nupui Tialdawli chu pasal dang an lo neih tir hman a ni.

kum 1968-ah L.Th zir turin Kohhran tirhin Jorhat-ah a kal a. April 22, 1969-ah Dibrugarh Medical College-a Nurse hnathawk Chhunkimi nen, Rev. Biaktluanga Tlau chuan a inneih tir a. Pi Chhunkimi nen hian fapa 3 an nei. L.Th a zawh hnu hian B.Th a zo leh a, hna a thawh hnuah BD a zo leh a ni.

Kan ram hruaitu thenkhatte leh milar thenkhatten an thlahna thu ziak hi han tarlang ila.

Pu Robert Romawia Royte, MLA & Owner of Aizawl FC

“Goodbye Rev H.Killuaia, RIP.
Mahni mihringpuite tana thiltha tih leh ram leh hnam tana dik taka rawngbawl hi Pathian rawgbawlna a ni tih ringtlat a;nunpuitu Rev H.Killuaia boral ta mai hi ava uihawm em! Hla phuah thiam leh Ziaktu ropui a ni.

Hmaichhanah kan inhmu zut theilo nain telephone leh Whatsapp in kan inbe fo thin.
Dawt sawi a haw hle a, Ramhruaitute dawt sawi pawi zia tepawh min hrilh thin.Assembly session a lo thlir uluk thin a,thurawn te min pe fo bawk.

Mizo Hnam veitu leh Zofate hmakhua ngaitu Pastor ropui kan chan ta.A chhungte zawng zawng leh amah ngainatu zawng zawngte Lalpan awmpuiin thlamuan mawlh rawh se.”

Pu Lalduhoma, Mizoram Chief Minister
“Rawngbawltu ropui, ziakmi leh hlaphuah thiam Rev. Dr. H. Killuaia, mi nun ngil leh entawntlak tak chuan chatuan ram min lo pansan ta tih ka lo hria a. A uiawm ka ti ngei mai.
Kohhran leh khawtlang tana a thahnemngaihna te, fakna hla tha tak tak hmanga a thuchah te, a kutchhuak lehkhabu tha tak tak te avangin kan hrereng tawh ang.
A kalsan tak kohhran hote leh amah hmangaihtute zawng zawng Pathianin awmpui zel se tiin ka tawngtai a ni.” –

Frederick Lalrindika, Pathian thu hriltu (Evangelist)

RAM LEH HNAM TANA MITTUI SENGA ṬAWNGṬAI ṬHIN KAN CHAN TA | Rev Dr H Killuaia (R.I.P) – Frederick Lalrindika
Kei aia hria an tam hle ang, nimahsela kei aia la naupang zawk ṭhalaiten vawiin a kan sun hi kan ram leh hnam tan a hlut zia tlemte tal a an lo hriat belh theihnan kan ti lang a ni e.
*ṬAWNGṬAINA TLANG DIN TU: Nehemiah Prayer Mountain Lunglei hi a dintu a ni.
PATHIAN AṬANGA A HLA DAWN LANGSAR ZUALTE:-

1. Indona – Synod Choir
2. Lalpa min ṭawngṭai tir rawh
3. Rorelna dik chu luipui angin luang se
4. Sakeibaknei puk ka hlau lo ang
5. Tho la, Lalpa hnen ah ṭawngṭai rawh
6. Ka nun hian a ngai em che Lalpa
   “Ka pu ka va han ui tak che em aw..
   I ipte(bag) keng tlak pawh ka nilo a sin. I ipte min ken tir erawh ka lawm hle a ni.
   Rev Dr H Killuaia: “Pathian hnen ah Ṭawngṭai a ka dil chhuah i ni, nangmah ka hriat hma che leh ka hriat hnu ah che i tan zing tin dar 4:00 am ah ka lo ṭawngṭai ṭhin”.
   Mi in va hmu ve ta che Ṭawngṭai a i dil chhuah a nih kha min ti ṭhin a. Niamahsela, ka rawn hmu duh ngailo che a. Amahin min la rawn pan mai ang, atan ka ṭawngṭai ṭhin a lawm, a hun takah Lalpa’n min in tawn tir mai ang ti in ka lo chhang ṭhin a, tih thu min hrilh te kha tun ah chuan lung ti chhe tu a ni ta.
   I dam lai ngei a ka tawng ve che hi ka lawm takzet a ni.
   Kan team min fuihna thu leh ni tur a min duh dan pawh kan la hre reng e.

• I ipte(bag) keng tlak pawh ka nilo a sin. I ipte min ken tir erawh ka lawm hle a ni.”

Bethsy Lalrinsangi, Pathian fakna hla satu (Gospel Singer)

“Ka nu leh pa, ka chhungte bâka ka thlarau nun kawnga min kaihruaitu, ka tana mi hlu leh pawimawh em em ka pu duhtak, Rev Dr. H.Killuaia chuan nimin (11.7.25) khan rawng a bawl sak ṭhin Pa hnênah min lo hahchawlh san ta, ka ngaiin ka va ui tak em!
.
Kohhran leh hnam tâna Rohlu kan chân ani mai lova ka tan leh kan nupa tân pawh hian chânna nasa tak ani tel si a, (chutiangin mi tam tak tân pawh) Rimawi khawvel bikah phei chuan ka tleirawl chhoh tirh a Pathian in hla ṭha tak tak a pek ka sak thin:
“Lalpa min ṭawngtai tir rawh”,
“Tho la Lalpa hnenah ṭawngṭai rawh”, tih leh
“Ka nun hian a ngai em che” tih hla avanga mi tam takin Nun thar hial an lo neih ve phah na hla sa theia ka awm te, khâng hla ropui tak tak sa tura min thlang ve tlat mai ṭhin te kha ka damchhung lawm a tling tawh dawn si, ka hlut zual mange…!
.
Tin, nula ta kha chu ka zin chhuak nasa ṭhin si a hla tak tak mahni a zin tur ka nih te khan min ngaihtuah ve em em ṭhin a mahse chuti chung pawh chuan chhel taka Pathian tâna awm tur leh Lalpa rawngbawl hlut zia leh hlawk zia nasa taka min fuih sauh sauh ṭhin na khan vawiin hun mai bakah rawngbawl leh zel duhna thinlung leh inpêkna min lo tuh nasa tih hi hai rual a ni lo.. Ka tân a i hlut zia hi ka hrechiang zual deuh deuh dâwn ani Pu…”
.
Sawi tur a tam ka sawi seng lo, engpawh nise Kohhran leh Ram tâna ṬHINGṬHI a i ṭawngtai tlat ṭhinna khân rah duhawm tak a la thlen ngei ang tih hi ka ring tlat a tunlai khawvela kan Ram leh mimal tinin kan mamawh em em i hla te hian thu ala sawi zel ngei ang !
Kan ngai bâng dawn lo che, muangte’n Pâ ângchhûng ah chuan chawl nâng che Pû…”

C. Lalzarmawia, Hla phuahtu/Zaithiam (Songs Writer/Music Composer/Gospel Singer)

“Rev. H. Killuaia, ka hlauhthawn rûk ang chiahin thil a thleng a ni maw!! Rimawi hmanga rawngbawlna thinlung pûa bul ka țanna kawngah thûk takin i inrawlh a, ka tân i hlutzia hi ka ngaihtuah fo țhin a, ka ngaihlû che tih hi i chhûngte pawhin an hriatthiam ka ring. Damdawiin a ka tlawh lo che hi ka inthiam thei dâwn lo a nih hi! Dam rih la tiin kan lo ţawngțai
ve tlauh² a sin le!
Sawi tur ka ngah a, i pualin post sei tak ka la siam leh zâwk ang a, utube a awm lo kan video te pawh kha kan la tlângzarh law law a niang chu. Lalpa’n i kalsan tâk nangmah hmangaihtute min thlamuan mawlh rawh se. Lalpa kan ngai che”

Pensy B. Lalthangliani, Pathian fakna hla satu (Gospel Singer)

Rev. Dr. H. Killuaia thlah nan
“Kum 20 bawr vel mi kan nih khan cable tv awm tantirh kha a ni a,chutih lai chuan U-Mapuia ( @leitlangpictures ) te nen video siam kan atchilh chho tan a. Kan video pakhatah khan mu chungin min zai tir pek a,chu video chu ka pu (Rev. Killuaia) hian alo hmu fuh hlauh mai a. Bazar veng lama Chhimtlang Vision neitupa, Pa-Lawmtea bulah min lo rel chiam mai a,khi nu khi chu a piangthar lo tawp ang,a zai duh dan atang khian min lo tia. Pathian fakna hla sa ta kha chu alo duh uluk em em kha alo ni a. Chumi hnu thla engemaw zat a liam hnu ah kan inah leng meuhvin a hla phuah ruah tham loh ‘Vuina nun neilo’ tih kha sa turin min rawn request a. Chumi ni chuan ka video alo hmuh hmasak ber tuma min tihdan zawng zawng kha a sawi a,kan hlimpui khawp mai a. Chuta tang chuan Krista avanga ka pu ngawih ngawih alo ni ta a ni.

Amah hi pa tlang (frank) tak leh Pathian duh mi tak a ni a, a tha lam kawng zawnga hruai theihna tur anih chuan a sawi duh chu sawi tlang pawp thin mi a ni. Pa fiamthu duh tak a ni na in, tih tak zeta Pathian auh kawngah erawh thu tak em em a ni.

Ka pasal neih dawn thleng a Pathian thu nena min umzuina te hi ka ngai hlu a,ka theihnghilh tawh ngai dawnlo. Tin, Doctorate Degree a dawn thu min rawn hrilh hi kan inbiak tawpna deuh a ni ta in ka hria..

Ka ui hle mai che a,natna leh hrehawmna in a chhaih buai theih tawh lohna ah che i awm tawh a ni tih erawh ka hriat rualin ka lawmpui che. Hun rei tak a rawng i lo bawl thin Pa angchhungah chuan thlamuang takin chawl ang che aw Lalpu. Mangtha le!”

Amah vuina en duh tan kan rawn dah chhuak e.

#zonews #revhkilluaia