Pu Lalrintluanga Sailo Sulhnu: A uina thu paws hrang hrangte, A sulhnu kan hmuh theih ang ang te

#ZONEWS July 22, 2025: Dampa bialtu MLA ni lai, Pu Lalrintluanga Sailo chuan uitu a ngah hle a, amah sunna leh uina thu sosial media lamah paws hrang hrangte kan la khawm a. A remchan dan angin he paws-ah hian kan dah belh zel dawn a ni. Uina thu paws hrang hrang bakah hian a sulhnu hrang hrangte kan dah belh zel bawk ang.

PU ZORAMTHANGA, EX-CHIEF MINISTER LEH MNF PRESIDENT

Pathian leh kan ram tana kan rawngbawlpui, Pu Lalrintluanga Sailo (65), MLA, Dampa Assembly Constituency; NCC, MNF GHQ- in chatuan ram min pan san ta mai hi pawi kan tiin kan ui tak zet a ni.

Pu Lalrintluanga Sailo hi kum 1976 khan kum la naupang takin Mizoram tan zalenna sualin a feh chhuak a, kum 1986-a India leh MNF-in inremna kan neih thlenga rinawm taka rammute zinga mi a ni. Zalenna suala a rammut tirh hian Zampuimanga Battalion-ah Private rank-in a awm a. Millitary training a zawh vek hnuah Z’ Battalion aṭangin Army Signal Service (ASS) lamah a awm leh a. ASS-ah hian kum 1983-ah Sergeant rank pek a ni. A hnaah a tuiin a thiam em em a, ‘Signal Rintluanga’ tia koh a hlawh phah hial reng a. Kum 1985-ah Second Lieutenant rank-ah a kai sang leh bawk.

Pu Rintluanga hi Inremna kan neih hnuah pawh MNF ban pawimawh tak ni zui zelin, MNF-ah nihna pawimawh tak tak a chelh chho a. Hotute thuawih thiam tak, ram hruaitu MLA a nih hma leh nih hnuah pawh kan ram leh hnam tan a hun tawp thlenga a theihna zawng zawng hlantu, ram leh hnam hmasawnna tura theihtawp chhuah ṭhin mi, mi tumruh tak, tuarchhel leh taima, mawhphurhna hlen zo tak mi a ni. Hetiang mi hlu tak kan chan mai hi Mizoram leh MNF tan channa nasa tak a ni a. A bial Dampa A/C mipuite leh a kalsan tak a chhungkuate pawh kan tawrhpui em em a ni.

A damloh tirh aṭanga a hun tawp thlenga enkawltu leh buaipuitu Mizoram lama mite leh MAX Super Speciality Hospital, New Delhi-a thawktu te, Delhi Mizoram House-a thawktu te leh Delhi Mizo te, a ṭul apianga lo buaipuitu New Delhi-a awm mek kan ram hruaitu Minister, MLA leh kan MP te, Mizoram lama a rawngbawlpui kan ram hruaitu zawng zawng te, a chenna khawtlang mipuite leh Kohhran ho te, MNF chhungkua leh Zoram mipui te, amah lainata ngaihsaktute leh ṭawngṭaipuitu zawng zawngte chungah lawmthu kan sawi nghal bawk e.

Mizoram leh MNF tana Pu Rintluanga inpekna leh a hnathawh zawng zawng te, a bial mipuite leh Dampa A/C hmasawnna tura a hnathawh zawng zawngte hi kan hre reng tawh ang.

Pu Lalrintluanga Sailo-in a kalsan tak a nupui Pi Lalbiakṭhuami leh fa te, a chhungte leh a bial mipui te bakah amah uitu zawng zawngte Pathianin thlamuanin awmpui tlat rawh se.

PU ROBERT ROMAWIA ROYTE, EX-SPORTS MINISTER LEH MLA
Ram tana kan thawhpui leh rorelna insanga ka thutpui – Pu Lalrintluanga Sailo (65), Luangmual veng, Dampa Assembly Constituency MLA ni lai chuan zanin (21.07.2025) khan Max Super Speciality Hospital, New Delhi-ah chatuan ram min pansan thu ka hria a, min thawng takzet a ni.

Ram tana theihtawp kan chhuah ho mek laia ropuina rama min kaisan ta hi ka ui takzeta, Mizoram tan leh a bial Dampa tana theihtawp chhuah thin tu Pu Rintluanga thla muangin chawl mawlh rawh se.

A kalsan tak, a chhungte leh amah hmangaih leh ngainatute Pathianin awmpuiin thlamuan se tih hi ka tawngtaina a ni.

PU LALDUHAWMA, MIZORAM CHIEF MINISTER
Ram tana kan thawhpui, Legislator tha leh taima, thusawi thiam leh debater ropui, Pu Lalrintluanga Sailo (65), Dampa Constituency bialtu MLA chuan chatuan ram min pansan tih ka lo hria a. Min thawngin ka ui hle mai.

Thlatir maia New Delhi ka zin khan, damdawiinah amah ka hmuh theih loh avangin Mizoram House-ah a nupui fanaute ka tlawh a. Tha tak a dam chhuah leh theih nan duhsakna hlanin ka tawngtaipui a. Nimahsela, Pathian remruat dan chu hetiang hi a lo ni ta si a ni.

New Delhi Mizoram House-a thawktute chu a tul apiang lo buaipui a, a nupui fanaute lo tanpui turin ka chah a. Sawrkar pawhin tih tur apiang a ti zel dawn a ni.

A kalsan tak amah hmangaihtute Pathianin awmpuiin thlamuan rawh se.

PU DR. R. LALTHANGLIANA, EX-HEALTH MINISTER
Sorkar leh Party a ka thawhpui Dampa Bialtu MLA Pu Lalrintluanga Sailo (66) chuan chatuan ram min pansan ta. Pu Rintluanga hian Hnahthial District thar din chhoh a nih lai pawh khan min phurpui em em zel a. Mimal taka inpawh em em kan nih bakah Sorkar ang pawha thawhpui nuam, mi tlang tak leh nelawm tak a ni. Thinlung takin ka ui a, a kalsan tak a chhungte Pathianin awmpui mawlh rawh se.

PI LALRINPUII, HEALTH MINISTER
Ram rawngbawlnaa ka thawhpui, Dampa bialtu MLA Pu Lalrintluanga Sailo chuan hun lo taka mual min liam san tih ka lo hriatin a pawi ka tiin, ka ui takzet a ni. A kalsan tak a nupui leh a fate Lalpa’n thlamuanin awmpui tlat rawh se.

PU LALNGHINGLOVA HMAR, SPORTS MINISTER
Ram tana kan thawhpui Pu Lalrintluanga Sailo (65), Luangmual veng, Dampa Assembly Constituency MLA ni lai chuan zanin (21.07.2025) khan Max Super Speciality Hospital, New Delhi-ah chatuan ram min pansan ta. A pawi ka tiin ka ui takzet a ni.
Pathianin a chhungkua leh MNF party chhungkua thlamuanin awmpui rawh se.

---

I am deeply saddened to learn of the passing of Pu Lalrintluanga Sailo (65), a resident of Luangmual veng and a fellow member of Mizoram Legislative Assembly from Dampa Assembly Constituency tonight (21.07.2025) at Max Super Speciality Hospital, New Delhi.
May God comfort his loved ones and the MNF community during this time of grief.

PU VANLALHLANA, PWD MINISTER
Ram tana ka rawngbawlpui, Pu Lalrintluanga Sailo, Dampa Bialtu MLA chuan zanin dar 9:00 khan Max Hospital, Delhi-ah min lo boralsan a.
Pu Rintluanga hi pa fel leh fiamthu duh tak a ni a, ram leh hnam tan zalenna sualin a theihna zawng zawng hlantu a ni. Assembly House tingaihnawmtu leh debate pawh thiam tak a ni a. Hetia min boralsan ta mai hi ka ui takzet a, ram tan chânna nasa tak a ni.
Pathianin a kalsan tak a nupui fanaute leh a awmna MNF party te thlamuanin awmpui mawlh rawh se.

PU TBC LALVENCHHUNGA, ADVISER TO CHIEF MINISTER
Hon’ble MLA Pu Lalrintluanga Sailo, Dampa A/C bialtu chuan zanin khan Max Hospital, New Delhi ah chatuan ram min pansan ta. Pa hrohrang na, a bula nelawm em em si kha MLA ka nih ve hma, Govt Dy Chief Whip a nih laia kan thlalak hian amah ka han thlah ang e. Thlamuangin chawl se.

VANNEIHTHANGA
I hmun ruak a va zau dawn tehreng em! Thlamuang takin Pa ang chhungah chawl ang che!..
Dampa bialtu MLA zahawm tak Pu Lalrintluanga Sailo chuan hun lo takin chatuan ram min lo pan san ta a, amah hriatreng nan, a bial chhunga Bangladesh nena insumdawn tawnna hmun tur February ni 12, 2021-a kan tlawh hona atangin kan inhrechiang tan a, phulo hle mah ila, thiantha a min neih ve tlat thintu a ni.
Pu Lalrintluanga Sailo hi pa nelawm leh thian kawm thiam tak a ni a, ram leh hnam vei em em a ni. Debater tha tak a ni a, Assembly session ti ngaihnawmtu ber pakhat a ni. A hmun ruak a zau dawn hle mai!
Pu Rintluanga hian a bial mai ni lo, Mamit district hmasawnna tur a vei em em thin a, nghakhlel taka a thlir thin, Bangladesh nena insumdawnna hmun tur, a puitlin hun hmu hman lova mual min liam san ta mai hi a hrilhhaithlak tak zet a ni! A kalsan a nupui fanaute Lalpan awmpui se, a thlarau Pa angchhungah thlamuang takin chawl mawlh rawh se!..

CHAWNGCHHUMA CHAWNGTHU
TLAWMNGAI KA CHAN, KA VA SUN NASA RUA EM !!!
Ka thian Tluanga Sailo hi Remna awm hnu a ka hriat ve chauh a ni. Vawi tam tak Campaign in kan chhuak dun thin a. Fakawm tak a ni. Tlai khaw hnu ah kan Makpa te Makpa a lo ni ve leh a, thian kan nih bak ah ralation kan lo nei ve leh zel a.
A fakawm em emna ka hriat chu a thilphal hi a ni.Lunglei MNF hruaitu te hi a in a chaweilo hi an awm bar awm lo ve. Mite leh lian a thliar lo, Chaw lo ei ru, kan awmna zuk thlang deuh mahse, in haw lam leh kal lam Motor in kan hruai thei che u a ti thin. Chu chu a takin a ti mai a ni chuan….kan In vel a Chaw ei zing ve tak Aizawl mi, Aizawl va kal ve a tawngkam tha pawh min hmuh ngai lo hi an tam a nia!! ka Chhiar seng lo !!!! Thianpa Rintluanga hian kan in a chaw a ei awm pawh hi ka hre lo, mahse a mi sawmna zahawm kan tia kan chhàn theih loh vanga kan biruk san chang pawh hi a awm….. Mizoram fachuam, Thian hlu, Mi hlu hetiang ramin a chan hi a va uiawm teh lul em… MNF tan chuan Pu Laldenga tluk zet a uiawm a ni… Ka ui mang e, ka Ui mang e, Zo hnam Pasaltha kan Daingul a tliak ta.

MIZORAM FOOTBALL ASSOCIATION – MFA
SUNNA

Kum 2005-2008 chhunga Mizoram Football Association (MFA) Executive Committee member Pu Lalrintluanga Sailo, MLA in July 21, 2025 a chatuan ram min pansan ta hi Mizoram Football Association chuan pawi a tiin, ram tan leh Football chhungkaw tana channa nasa takah a ngai a ni.

MFA chuan Mizoram Football hmasawnna atana theihtawp chhuah thin Pu Lalrintluanga Sailo chhungte leh lainate zawng zawng a tawrhpuiin Pathianin awmpuiin thlamuan se a ti takzet a ni.

Issued by Information, Publicity & Documentation Committee, Mizoram Football Association

PU LALRINTLUANGA SAILO SULHNU LEH AMAH KAIHHNAWIH HRIM HRIM THLALAK LEH VIDEO HRANG HRANGTE

DAMPA SAVAWM
David Sailo
23rd July 2025
Pu Rintluanga pual…

Politics luhchilha chenchilh te chuan engti kawng pawha lar hi a tha ber (All fame is good fame) an lo ti thin a, an bûk ti rittu ah an ngai fo a, a nihna chen a awm tlat si a ni.

Thenkhat chu thusawi thiam, mi hneh thei riaua thusawi thiam mi an awm a, chu chu an Champion pui mai. Barak Obama te kha a President hmaa a larna chu thusawi thiam bik riauna a ni a, hei hian tawngkam thiam satliah a kawk lova, mi hneh thei khawpa thusawi awmze nei a ni.

Thenkhat chu thusawi thiam miah lo, tlawm dém mai, thawk melh melh chi, an thiltih leh an ngawichawihna chu an hnathawh tlawm hmanga mi ngainat hlawh tlat chi an ni leh a. Then khat chu dan leh kalhmang hre em em mai, eng Issue ah pawh sawi tur ril nei thei reng mai chi an ni bawk a, heng ho hi Political Field a Champion pui theih vek zia a ni.

KAN SAWI MEK HI :
Mi phunglung, pawisak chiam nei lo, tawngkam pawh a chang chuan ram hmarh mai, a hnimhnai apiangin an ngainat tura rilru chhungril tha tlat thung si mizia, Pu Lalrintluanga Sailo a boral hi Mizote tan chânna nasa tak a ni.

Kum 16 a nih atangin, tlangval nun zalen tak tak pawh a chen hmaa a rilrua a thawh nat ang anga Zoram tana rammu hmiah ngam, Politics a MLA ni tura kum 20 liam a teirei peih tlatna te hi CYMA, MZP, MSU hruaitu, Politics rilruk rânte hian inzir nan hmang ngam se a duhawm hle.

Lehkha thiam sang a ni lo, mahse in keu harh mi tak a ni tih a tawngka chhuak leh a hawiher hian a ti lang tlat thung. A Qualification aiin a Standard hi a sang a ni. “Dampa savawm” ti a kohna kha Babutea tih aiin hmanruaah a hmang thiam tlat a, hetiang mi, tuangchhah em em hi a ni Politician chu !!

Kum 65 vel chauh mai min han dampui hi chu kawng harsa a zawh tam zawk chhûtpui hian a tlem mah mah a ni. Mi tlang reng rawng tak mai. Ngaihdan lo pui Amen hluah chi ni ve lo, a lem leh a dera mi hmachhawn thiam lo chi (Kohhrana tlatlum lo chi!!) mize nghet tak nei a ni a, a nun hi a hlu a, hetiang mi, lemchang ngai lo hi kan Politician ah hian tlemte chauh tak tak an awm.

KAN UI CHE AW :
House a i che tla, Dampa bial i hrut hnehsawh dan zawng zawng, “Top Up thusawi” thleng khan bengah a cham a, i ngaihtuah a, i vei a, i vil hneh tih hi Zoramin a hria e. I na satliah emaw kan tih laiin thih i lo ngam reng mai hian min barakhaih a ni. DAMPA SAVAWM ropui hriatin kan hre reng dawn che a, Dampa Constituency hming lam rik a nih rualin he bial neitupa, DAMPA SAVAWM, Pu Lalrinrluanga Sailo hming hi hriatchhuah a ni reng tawh ang le!!

TLIPNA :
I kalsan tak, buhfaitham tham taima, i nupui leh fanaute Chunglam thlamuanna kan beisei a, thaw tek tek chung tala i rawngbawlna, Zoram i rawn rap leh lo erawh a hrilhhai thlak kan ti mange. I sulhnu, i hlimthla, i tawngkam ropuite kan theih chen chen lo sawi hi i tana kan tih theih chhun a ni mai e. A va ho tawh tak em!!
Thlamuang takin chawl nang che!!

PU LALRINTLUANGA SAILO VUINAA THUSAWI HRANG HRANGTE